Prezidente Autoridade RAEOA-ZEESM, José Luís Guterres ‘Lugu’. Imajen/António Gonçalves

DILI,  15 novembru 2019 (TATOLI) – Prezidente Autoridade Região Administrativa Espesial Oe-Oecusse Ambeno (RAEOA) no Zona Ekonomia Espesiál Sosiál no Merkadu (ZEESM), José Luis Guterres, hateten antes hala’o kna’ar iha RAEOA sei halo vizita bá instituisaun Estadu hotu no Igreja.

“Antes ha’u bá Oe-Cusse hakarak vizita primeiru ita-nia instituisaun Estadu. Ami husu ona audiénsia ba Prezidente Repúblika, Prezidente Tribunál Rekursu, no mós Amu Bispu. Ami hakarak antes bá Oe-Cusse bele fó ami-nia respeitu tomak ba institusaun Estadu Nasionál para ami bá iha ne’ebá mós iha konesaun ne’ebé di’ak, sira mós bele ajuda”, hateten Prezidente Autoridade RAEOA-ZEESM hafoin hala’o vizita bá Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, iha eskritóriu MKAE, Palácio Governo, ohin.

José Luis hatutan, vizita bá ministru no sekretáriu sira hotu ho objetivu halo konesaun di’ak filafali entre Oe-Cusse ho rai boot ne’e (Dili), atu hatudu mós katak ministru, sekretáriu Estadu sira atu bá rai-ketan la persiza husu autorizasaun ba Prezidente.

“Tanba rai ne’ebá ita-ni’an, Governu ida de’it, Estadu unitáriu ne’ebé ba ministru no sekretáriu Estadu sira karik atu bá basta informa de’it para nune’e ami-nia ema simu imi ho dignidade”, katak.

Nia fó ezemplu bainhira hasoru malu ho Ministru Agrikultura no Peska, sira disponivel para implementa programa balu iha ne’ebá. Tanba ne’e kontente, no hanesan Estadu Unitáriu fó liman ba malu para ajuda povu Oe-cusse.

“Ha’u mós ba iha Pokuradór Jerál Repúblika ho intensaun katak fó kooperasaun tomak ba Prokuradós Jerál Repúblika para buat ne’ebé nia hakarak halo iha rai Oe-Cusse”, dehan.

Iha sorumutu ho MKAE, parte rua ko’alia uitoan mós kona-ba setór ekonómiku, liuliu infraestrutura bázika.

“Iha hasoru malu ne’e aproveita mós oportunidade felista inisiativa ne’ebé Governu halo ho Banco Central ne’ebé halo desizaun ida atu fó garantia kréditu ba setór privadu, ne’e buat ida di’ak, no ami fiar katak desizaun ida ne’e ba mós iha rai Oe-Cusse no haree katak Oe-Cusse oan ne’ebé iha posibilidade bele mós ultiliza meiu ne’ebé Ministériu Koordenadór Asuntu Ekonómiku ho Banco Central halo ne’e”, sujere.

Eis Ministru Negósiu Estranjeiru no Kooperasaun (MNEK) ne’e afirma hakarak maka dezenvolve zona rurál.

“Ita-nia povu iha ne’ebá moris ho difikuldade tebetebes, presiza halo buat ruma ne’ebé ita iha, Dili ne’e bee iha, más iha fatin barak ne’e laiha bee-moos, estrada área rurál ne’ebé importante ba dezenvolvimentu ekonómiku, ne’ebé buat sira ne’e hotu ita sei halo”.

José Luis mós preukupa kona-ba aeroportu internasionál Rota de Sândalo, no haree ne’e aeroportu ida ne’ebé di’ak no boot, maibé oinsa ho manutensaun, ne’ebé presiza haree tanba manutensaun mós sei presiza kustu ne’ebé boot.

Hetan Pose, Prezidente RAEOA Foun Promete Sei Rezolve Kestaun Bázika Moris Populasaun

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here