Primeiru-Ministru, Taur Matan Ruak kaer liman ho Prezidente Autoridade RAEOA-ZEESMS foun, José Luís Guterres ‘Lugu’, hafoin simu pose iha Palásiu Governu ,kuarta (13/11). Imajen Tatoli/António Gonçalves

DILI, 13 novembru 2019 (TATOLI) – Primeiru-Ministru (PM), Taur Matan Ruak fó pose ba Prezidente Autoridade Rejiaun Administrativa Espesiál Oe-cusse Ambeno (RAEOA) no Zona Espesiál Ekonomia Sosiál Merkadu (ZEESM) foun, José Luís Guterres ‘Lugu’ ba mandatu tinan lima.

Lugu hetan pose bazeia Proposta Rezolusaun Governu ne’ebé aprezenta husi Xefe Governu no hetan aprovasaun liuhosi reuniaun Konsellu Ministru iha loron 6 novembru.

Antes ne’e, Marí Alkatiri ramata ninia mandatu nu’udar Prezidente Autoridade RAEOA-ZEESM iha loron 30 jullu 2019 no kontinua hosi Prezidente Autoridade Interinu, Arsénio Paixão Bano durante loron 120, hahú hosi 1 agostu 2019.

Prezidente Autoridade RAEOA-ZEEMS foun, José Luís Guterres ‘Lugu’.Imajen tatoli/António GonçalvesGoncalves

Iha ninia diskursu iha seremónia pose, Prezidente Autoridade foun, hateten importante liu ba nasaun no povu Oé-cusse atu kontinua ho dezenvolvimentu ne’ebé hahú ona, inklui dezenvolvimentu ba família rurál iha territóriu Oé-cusse.

“Rezolve kestaun bázika Moris ba populasaun hanesan bee no saneamentu, abitasaun, saúde, rede eskolár, hanesan énfaze ne’ebé ita presiza hala’o ba produsaun agro-pekuária no peska atu povu bele hetan benefísiu emediatu no bele dezenvolve industria, kria kondisaun ba turizmu no servisu seluk ne’ebé povu presiza ba ohin loron”, nia tenik iha Palásiu Governu, kuarta ne’e.

Biban ne’e, nia agradese ba parte hotu ne’ebé fó biban ba nia hodi lidera RAEOA-ZEESM.

“Agradese ba Primeiru-Ministru no Governu, ba konfiansa ne’ebé VIII Governu no lideransa hosi Aliansa Mudansa ba Progresu (AMP) fó mai ha’u ata, atu serbí nasaun no povu iha Oé-cusse hanesan Prezidente RAEOA”, nia subliña.

Primeiru Ministru, Taur Matan Ruak (klaran) kaer liman ho José Luís Guterres ‘Lugu’ (karuk) no Arséno Paixão Bano (loos). Imajen Tatoli/António Gonçalves

Lugu rekoñese, sei iha dezafíu barak tebes no problema iha Oé-cusse, inklui rekoñese sebisu no obra ne’ebé halo ona husi Prezidente Autoridade sesante , Marí Alkatiri no ninia ekipa.

“Ami sei kontinua nafatin halo komunikasaun ho ita boot (Prezidente Autoridade sesante) no administrasaun sesante tanba ita presiza rezolve buat balun hamutuk ho Governu Sentrál hanesan Ró Haksolok ne’ebé ohin loron iha hela Rai Portugál”, nia dehan.

Antigu Vise Primeiru-Ministru haktuir, diskusaun ba kriasaun no aprovasaun RAEOA-ZEESM ne’e akokntese entre IV Governu ne’ebé lidera husi Primeiru-Ministru, Xanana Gusmão, ho lideransa FRETILIN ninia ne’ebé reprezenta hosi Marí Alkatiri no lori tempu barak maibé konsege hetan aprovasaun iha Konsellu Ministru tempu ne’ebá, aprova unanimidade hosi Parlamentu Nasionál no promulgadu hosi eis Prezidente Repúblika, Taur Matan Ruak.

“Ita labele haluha espíritu unidade no kriasaun RAEOA-ZEESM la’os partidu ida nian maibé halo parte husi interese superiór Repúblika Demokrátika Timor-Leste (RDTL)”, Lugu afirma.

Nia dehan, sei hamutuk ho Governu sentrál hodi konferénsia kona-ba investimentu ba rai Oé-cusse, tanba konsidera investimentu hosi rai laran no liur maka bele kria empregu no rendimentu ba rai laran.

Maski nune’e, nia rekoñese, dezenvolvimentu presiza transparénsia nomós presiza partisipasaun hosi povu tomak.

José Luís informa, iha ninia lideransa, estrutura eleitu hosi suku nian bele iha reuniaun dala rua iha  tinan ida nia laran, atu bele rona hanoin husi autoridade suku nia  hakarak atu dezenvolvimentu bele la’o ho di’ak iha rai Oé-cusse.

Nune’e mós, nia dehan tan,  presiza kria ambiente polítiku sosiál ida ne’ebé estável tanba bele ajuda investimentu rai seluk no mós nasionál.

Parte seluk, PM Taur iha ninia diskursu hateten, nia parte sente orgullu tebes bele fó pose ba Prezidente RAEOA foun.

“Uluk ha’u sai Prezidente Repúblika, ha’u fó pose ba Maun Boot Marí Alkatiri ne’ebé hanesan konseitór ba kria ZEESMS-RAEOA iha tempu ne’ebá”, tenik atuál Xefe Governu.

Primeiru-Ministru, Taur Matan Ruak fó pose ba Prezidente Autoridade RAEOA-ZEESM foun, José Luís Guterres ‘Lugu’ iha Palásiu Governu, kuarta (13/11). Imajen Tatoli/António Gonçalves

Tuir PM, Oé-cusse hanesan projetu nasionál ne’ebé  la’o maka’as ona, hahú hosi kriasaun to’o ohin loron, maski sei iha buat balun maka presiza halo.

“Sira ne’ebé ita halo ona, pesoalmente agredese Prezidente Interinu no ekipa tomak, espesiál ba Maun Boot Marí Alkatiri, ba ita boot sira ninia esforsu ne’ebé halo dezenvolvimentu Oé-cusse la’o to’o ohin loron”, nia akresenta.

Nia informa, ekipa foun ne’ebé sei kaer ukun iha RAEOA sei la ba halo buat foun, maibé hatutan de’it buat ne’ebé halo ona.

“Ita nia mehi maka oinsá maka Oé-cusse oan sira bele benefisia dezenvolvimentu ne’ebé ita halo ona iha ne’ebá”, nia katak.

PM Taur promete, Governu sentrál disponível no nakloke iha kualker altura bainhira Prezidente Autoridade ho ninia ekipa presiza tulun durante no hafoin tranzisaun.

“Ami prontu no kontinua ajuda ita boot no fó tulun buat ne’ebé ami bele para ita nia atividade iha Oé-cusse labele para no labele redúz ninia ritmu”, nia subliña.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here