Sorghum ka batar ain-naruk. Imajen/Egas Cristovão.

MAUBARA, 14 novembru 2019 (TATOLI) – Silvano dos Santos, hanesan rai-na’in me’ebé oferese gratuita rai ektare lima ba Movimentu Kamponeze Timor-Leste (MOKATIL) hodi loke sentru prosesamentu Sorghum ka batar ain-naruk, iha Aldeia Kaikasavou, Suku Guicho, Postu Administrativu Maubara, Munisípiu Liquiçá hatete sei hetan porsentu 10 husi produsaun sorghum.

Abitante Guicho na’in-tolu mak oferese rai ektare lima ne’e ba MOKATIL hanesan Silvano dos Santos ektare tolu, Camilo dos Reis Gama oferese ektare ida no Rogério Nunes ektare ida.

Reprezentante rai-na’in, Silvano dos Santos, hateten rai ektare lima ne’e oferese gratuita hodi harii sentru prosesamentu Sorghum.

Entretantu, seidauk ko’alia ho MOKATIL kona-ba fahe lukru, maibé produsaun la’o hafoin ko’alia kontratu.

“Kona-ba benefísiu hosi rai ektare lima ne’ebé ami oferese, ami seidauk ko’alia ba ida ne’e, sira dehan ikus mak ami ko’alia, ami oferese gratuita. Rai ne’e ha’u la fa’an, sira mós la sosa, fulan-ida ha’u hetan netik 10% hosi produsaun Sorghum”, dehan nia iha Guicho ba Ajénsia Tatoli, ohin.

Tuir informasaun ne’ebé rai-na’in ne’e asesu hosi MOKATIL no Xefe Aldeia katak, aléinde sai sentru produsaun Sorghum, maibé fatin ne’e sei halo uma, halo animál nia luhan no nesesidade seluk tán.

“Xefe Aldeia mak lobi ha’u hodi oferese rai ne’e ba MOKATIL, katak rai sei kuda batar, kuda ai-farina, kuda buat sira ne’e depois mak ami hetan 10%”, dehan nia.

“Fofoun sira dehan sosa, maibé ha’u dehan rai ne’e ha’u la fa’an ida, ha’u-nia hakarak rai ne’e sira aluga de’it. Se aban bainrua sira la selu 10%, rai ne’e ha’u sei dada fali, tanba rai ha’u la fa’an no laiha kontratu ida kesi-metin. Se kompañia ida mai rai ne’e fó aluga nafatin”, tenik nia.

Silvano dos Santos ho rai na’in rua seluk sai membru MOKATIL mak oferese rai ektare lima ne’e.

Sentru prosesamentu sorghum estabelese uluk ona iha suku Guicho ne’ebé iha mós mákina lima ne’ebé utiliza hodi halo produsaun ba batar ain-naruk ne’e.

Notísia relevante : SEKoop Kompromete Sei Harii Sentru Prosesamentu Sorghum iha Postu Administrativu Hotu

Jornalista : Evaristo Soares Martins
Editora : Maria Auxiliadora

HAKEREK NO HATÁN

Please enter your comment!
Please enter your name here