Prezidente Autoridade RAEOA-ZEESM, José Luís Guterres ‘Lugu’. Imajen/António Gonçalves

DILI, 13 novembru 2019 (TATOLI) Iha Proposta Orsamentu Jerál Estadu (OJE) 2020, alokasaun ba Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM) hamutuk millaun $26, ne’ebé kompostu hosi kategoria saláriu no vensimentu millaun $8,818 (%33,8), bens no servisu millaun $14,483 (%55,5) no transferénsia públika millaun $2,783 (%10,7), enkuantu alokasaun ba kapitál menór no kapitál dezenvolvimentu laiha.

Montante orsamentu 2020 ba rejiaun espesiál ne’e, tun %66 kompara ho OJE 2019, ne’ebé ho montante millaun $76 no alokadu ba kategoria hotu.

Alokasaun orsamentu 2019 ba RAEOA-ZEESM, kategoria saláriu no vensimentu millaun $8,818, bens no sevisu millaun $14,483, kapitál menór millaun $1,697, kapitál dezenvolvimentu millaun $47,216, transferénsia públika millaun $2,783 no fundu kontijénsia millaun $1.

Prezidente Autoridade RAEOA-ZEESM foun, José Luís Guterres ‘Lugu’, hateten kona-ba kategoria rua ne’ebé laiha alokasaun orsamentu, nia parte sei konsulta ho autoridade sesante.

“Ha’u ladun akompaña orsamentu ne’ebé debate iha Parlamentu Nasionál, ha’u hatene de’it katak ha’u sei reúne ho Prezidente sesante atu haree orsamentu ne’ebé sei iha no orsamentu ne’ebé ita presiza tan, nune’e bele kontinua fali. Importante maka ita bele kontinua prosesu dezenvolvimentu iha ita-nia rai Oé-Cusse”, tenik Lugu iha Palásiu Governu, kuarta ne’e.

Notísia Relevante: Hetan Pose, Prezidente RAEOA Foun Promete Sei Rezolve Kestaun Bázika Moris Populasaun

Orsamentu 2020 ba RAEOA-ZEESM, hatudu despeza hetan de’it alokasaun orsamentu ba servisu operasionál rekorente.

Tuir Lugu, bainhira alokasaun orsamentu menus ona, presiza buka meiu seluk atu bele rezolve.

“Orsamentu ne’e importatante ba se de’it, maibé ita presiza mós buka meiu seluk hanesan ajuda internasionál ka ivestimentu. Ha’u prefere hein ekipa ne’ebé sei mai atu bele haree forma koletiva ruma hodi ami bele halo desizaun ida ne’ebé di’ak ba interese povu Oé-Cusse.

Nia informa, ekipa ne’ebé sei ajuda nia durante mandatu, sei mai antes 30 novembru maibé antes ne’e nia parte sei halo konsulta ho parte relevante sira.

“Ita presiza ekilíbriu no haree ema hotu, ita labele esklui ema ida ne’ebé atu halo governasaun ne’ebé di’ak iha rai Oé-Cusse. Ita labele esklui nein sira iha tasi, nein sira iha foho maibé ita serbisu hamutuk.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here