DILI,13 novembru 2019 (TATOLI)-Jestór Klínika Bairru-Pité, Inácio do Santos hateten kazu tuberkuloze sira ne’ebé mak pozitivu hanesan kabeen tasak sira haruka ba Tibar para halo tratamentu durante fulan rua bainhira negativu ona mak haruka fila ba uma.
Agora daudaun pasiente ne’ebé baixa ba moras tb iha Tibar hamutuk 30 itál sira ne’e la’ós mai husi fulan-outubru de’it maibé fulan-agostu nian hotu.
“Tanba sira ne’e depende ba sira-nia resultadu tb ne’e negativu mak foin fila. Se sira pozitivu nafatin ami bele tahan sira iha ne’ebá to´o fulan ida ka fulan rua depois mak haruka sira fila ba uma,” dehan Jestór Inácio do Santos ba media sira iha nia kna’ar fatin, ohin.
Médiku sira husi Klínika Bairru-Pité kada kuarta ba haree pasiente kazu tuberkuloze sira interna iha Tibar no iha enfermeiru ida husi Tibar mak metin nafatin ho sira hodi haree moras ne’e maibé iha kazu emerjénsia ruma ambulánsia Klínika Bairru-Pité iha para tula sira ba Ospitál Nasionál Guido Valadares (HNGV).
“Pasiente tb ne’ebé baixa (interna) iha Tibar ne’e la’ós mesak Klínika Bairru-Pité de’it maibé husi Sentru Saúde Comoro mós iha tanba sira iha kazu pozitivu barak no sira la iha fatin para baixa entaun refere hotu ba Tibar para baixa iha ne’ebá,” informa Jestór Kliniku Bairru-Pité.
Alende ne’e mós, tuir nia, daudauk ne’e Klínika Bairru-Pité seidauk rejistu kazu dengue maibé atu tama ona ba tempu udan sira preparadu ona para eduka populasuan sira hotu hadook aan husi moras ne’ebé perigozu.
“La´ós moras dengue de’it maibé hanesan mós ezemplu ISPA (Infesaun Vias Respiratória), isin katar, tb. Ida ne’e mós ami tenke halo promosaun ba populasaun hotu para sira hatene. Ho nune’e ami koko hela liuhusi edukasaun, sensibilizasaun ba sira no oinsá kada semana ida halo promosaun dala-rua ka dala-tolu ba populasaun sira ne’e para hodi hatene prevene aan rasik.
Notísia relevante:TBC Hamate Ona Ema Na´in Neen Iha Klínika Bairru-Pité
Jornalista : Felicidade Ximenes
Editór : Rafy Belo
