Prezidente Repúblika, Francisco Guterres Lú Olo. Imajen/TATOLI

DILI, 12 novembru 2019 (TATOLI)–Prezidente Repúblika (PR), Francisco Guterres Lú Olo, rekoñese kapasidade José Luís Guterres iha diplomasia no fiar katak sei susesu iha kna’ar foun nu’udár Prezidente Autoridade foun ba Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (RAEOA-ZEESM). 

Hafoin partisipa iha Komemorasaun Loron Nasionál Juventude iha Semitériu Santa Cruz, Dili, ohin, Xefe Estadu hateten nomeasaun ba Prezidente Autoridade RAEOA-ZEESM foun ne’e kompeténsia Governu maibé tenke rekoñese figura José Luís Guterres nian, katak, ho kapasidade ne’ebé iha sei lori benefísiu ba povu Oé-Cusse.

Lee mós: Semana Oin, José Luís Guterres Simu Pose

“Ha’u labele mete ba ida-ne’e, maibé ita tenke rekoñese, tanba José Luís ema ida-ne’ebé ita bele dehan katak nia mós uluk partisipa iha funu no partisipa mós iha diplomasia ho forte tebes. Nune’e, agora nia simu tan kna’ar foun ida, ne’e ninia responsabilidade no hein katak sei lori benefísiu ba ema hotu, partikularmente ba povu Oé-Cusse”, Lú Olo haklaken.

Xefe Estadu hatutan kna’ar foun ne’ebé José Luís Guterres simu, nu’udár responsabilidade boot ida-ne’ebé ema hotu hein.

Antes ne’e, José Luís Guterres dehan, atu hetan susesu, nia sei haka’as-aan atu serbisu hamutuk ho Oé-Cusse oan sira ne’ebé matenek, serbisu hamutuk ho povu no konsidera lian-na’in sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here