José Luís Guterres. Imajen espesiál

DILI, 08 novembru 2019 (TATOLI)—Prezidente Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM) foun, José Luís Guterres ‘Lugu’ sei simu pose iha kuarta (13/11).

“Primeiru-Ministru bolu ha’u mai hala’o enkontru ho nia no hato’o mai ha’u tomada pose ba prezidente RAEOA nian iha kuarta semana oin. Ha’u seidauk hatene oras simu pose nian maibé loron mak kuarta ne’e,” Lugu tenik iha Paláçio do Governo, ohin.

Nia dehan, kona-ba programa no serbisu saida mak nia atu halo iha RAEOA, nia sei ko’alia sai ba públiku hafoin simu pose tanba agora nia sei halo hela preparasaun.

Lee mós: Arsénio Bano Asume Kna’ar Nu’udar Prezidente RAEOA Interinu Durante Loron 120

Maski eis Prezidente RAEOA, Marí Alkatiri deklara katak atuál Prezidente RAEOA sei hala’o nia misaun tinan ida de’it, maibé nia la hatán.

“Ha’u respeita ema hotu. Demokrasia ema hotu bele ko’alia saida de’it. Ha’u sei la foku liubá deklarasaun polítika sira maibé ha’u foku mak prepara-aan no estuda dokumentu tomada pose nian iha kuarta mai ne’e,” Lugu informa.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here