Lorico Adventure selebra loron Masakre Santa Krús ba dala-28 ( 12 novembru 1991-12 novembru 2019), liuhosi tour "Dalan ba Memória" hodi hale'u munisípiu 12 inklui Rejiaun Administrativu Espesiál Oe-Cusse Ambeno. Imajen/Lorico Adventure

DILI, 12 novembru 2019 (TATOLI)-Lorico Adventure ho nia membru nain 30-resin selebra loron Masakre Santa Krús ba dala-28 (12 novembru 1991-12 novembru 2019), liuhosi  tour  “Dalan ba Memória” hodi hale’u  munisípiu 12 inklui Rejiaun Administrativu Espesiál Oe-Cusse Ambeno.

Notísia Relevante : Fó Onra ba Loriku Asua’in Ne’ebé Mate, Tenke Hametin Unidade

Lorico Adventure hala’o tour hal’eu teritoriu nasionál. Imajen/Lorico Adventure

Tour ne’e hahú iha loron 01 novembru ne’ebé dezloka   dahuluk ba RAEOA no termina ohin iha munisípiu Aileu hodi fila mai Dili. Iha tour ne’e grupu Lorico Adventure utiliza  motor crosser  akompaña dada ho bandeira nasionál RDTL no bandeira Komité 12 Novembru (K12N) tara iha motor lolon.

Ba Ajénsia TATOLI, ohin, iha Semitériu Santa Krús, Koordenadór   Lorico Adventure hanesan mós sobrevivente  Masakre Santa Krús, 12 novembru 1991, Nelson Turkel hatete, tour ne’e  atu habelar nafatin istória 12 Novembru 1991  ba fatin hotu, liu-liu iha area rurál ba  foin sa’e sira hodi  kontinua  hatene valór istória  luta nian.

“Programa ne’e ami hala’o hahú iha tinan kotuk no tinan ne’e husi inisiativa ami nia rasik,” informa Nelson Turkel.

Tour ne’e prienxe ho atividade loke filme akontesimentu 12 Novembru 1991  no  prienxe ho reflesaun ho joven sira iha kada munisípiu. Nune’e mós ekipa Lorico Adventure hala’o vizita ba mate restu 12 novembru nia rate ne’ebé iha munisípiu hodi presta omenajen.

Programa ne’e  inisiativa mai husi ekipa Lorico Adventure sira rasik la hetan apoiu  orsamentu lojístika ruma hosi governu, maibé  utiliza rasik rekursu ne’ebé sira iha hodi kontribui ba eventu nasionál no istóriku Timor nian.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here