SEJD Nélio Isaac Sarmento. Imajen/Antonio Goncalves

DILI, 12 novembru 2019 (TATOLI) – Atu fó onra ba juventude loriku asua’in ne’ebé uluk barani see hirus-matan ba mate hodi hafila rai ne’e ba hetan ukun rasik aan maka tenke hakribit violénsia hodi hametin unidade nasionál atu kontribui ba dezenvolvimentu país.

“Ha’u husu ba juventude hotu-hotu atu hakribit violénsia no konflitu hodi hametin unidade nasionál mak joven ne’ebé fó onra ba juventude loriku asua’in sira ne’ebé barani ba mate tanba hakarak ukun rasik aan”, Sekretáriu Estadu Juventude no Desportu, Nélio Isaac Sarmento, iha data markante masakre Santa Cruz ba tinan 28 no loron juventude ba dala-14 iha Santa Cruz-Balidi, ohin.

Nélio Isaac Sarmento dehan, ohin, iha fatin ne’e (Santa Cruz), joven loriku asua’in barak mak terus, raan fakar, mate no lakon to’o ohin seidauk hetan. Nune’e iha loron markante ne’e joven hotu-hotu tenke selebra ho orgullu hodi fó onra ba eroi sira ne’e.

Juventude Timor-Leste atu kontinua hametin unidade nasionál hodi hapara no hakribit konflitu atu hamutuk hodi dezenvolve rai ne’e tuir mehi loriku asua’in sira.

“Ita-nia juventude sira tenke rai ona kroat hodi kontribui ba pás no estabilidade”, nia sujere.

Nélio Isaac Sarmento husu ba joven sira atu kontinua estuda maka’as hodi bele lori nasaun ne’e ba oin.

Masakre Santa Cruz ba tinan 28 no loron juventude ba dala-14 ho tema “Juventude mak Futuru, Autór ba Unidade no Dezenvolvimentu Nasionál”.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here