Prezidente Tribunal Rekursu, Deolindo dos Santos. Imajen/Antonio Goncalves

DILI, 12 novembru 2019 (TATOLI)–Tribunál Rekursu (TR) sei estuda argumentu Prezidente Repúblika no pareser hosi Parlamentu Nasionál (PN) kona-ba artigu balun hosi Lei Fundu Petrolífera (LFP) no Lei Atividade Petrolífera (LAP).

Pedidu ne’e Prezidente Repúblika, Francisco Guterres ‘Lú Olo’ haruka ba Tribunál iha 30 outubru liubá.

Hafoin Prezidente Repúblika husu Tribunál Rekursu halo apresiasaun, Tribunál Rekursu notifika Parlamentu hanesan autór alterasaun ba lei rua ne’e.

Lee mós: PN Reapresia Ona LFP, Mantein Artigu Ne’ebé TR deside Inkonstitusionál

“Agora daudaun sei estuda hela depois sei foti desizaun haree ba tempu ne’ebé konstituisaun hateten. Fundamentu sira mai hosi Prezidente Repúblika, pareser sira mai hosi Prokuradór Jerál Repúblika no pareser hosi Parlamentu Nasionál nian depois sai baze ba Tribunál Rekursu foti desizaun”, Prezidente Tribunál Rekursu, Deolindo dos Santos, ko’alia kestaun ne’e hafoin partisipa komemorasaun Masakre Santa Cruz ba dala-28 no Selebrasaun Loron Nasionál Juventude ba dala-14, iha Semitériu Santa Cruz, Dili, tersa ne’e.

Nia haktuir, lei rua ne’e, ida Prezidente Repúblika fiksa prazu ba loron 15 no ida ba loron 20 nia laran hafoin TR foti desizaun.

“Tanba lei rua iha relasaun, entaun Tribunál Rekursu sei esforsu másimu atu foti desizaun ne’ebé lalais no iha tempu ne’ebé hanesan”, Deolindo informa.

Nia lakohi fó sai pareser hosi Parlamentu Nasionál no Ministériu Públiku ne’ebé hetan notifikasaun ba lei rua ne’e, liuliu artigu hira no problema iha ne’ebé mak halo Prezidente Repúblika husu TR halo apresiasaun.

“Ita-boot (jornalista) nia pergunta kona ona konteúdu desizaun, ha’u labele hateten. Bainhira ha’u hateten entaun desizaun ona”, resposta Prezidente TR ba jornalista sira.

Nia mós lakohi fó-sai fundamentu hosi Prezidente Repúblika ba lei rua.

Prezidente Tribunál Rekursu konsidera Lei Atividade Petrolífera halo alterasaun dala-rua ne’e normál tanba konstituisaun loke dalan, ne’ebé laiha problema.

Prezidente Repúblika haruka ba TR bazeia ba Konstituisaun RDTL artigu 149 (Fiskalizasaun Preventivu Lei-Inan nian).

Alínea dahuluk hosi artigu ne’e hateten Prezidente Repúblika bele husu ba Tribunál Supremu Justisa nian atu halo apresiasaun preventivu kona-ba konstitusionalidade ba naran diploma ida-ne’ebé nia simu atu halo promulgasaun.

Alínea daruak hosi artigu ne’e esplika apresiasaun preventiva ba konstitusionalidade bele husu iha prazu loron ruanulu nia laran, sura hosi loron ne’ebé simu diploma, maibé Tribunál Supremu Justisa nian tenke fó-sai iha prazu loron ruanulu-resin-lima ne’ebé Prezidente Repúblika bele habadak tanba urjénsia.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here