Embaixadór Suésia ba Indónezia, Marina Berg. Imajen: Tweeter

DILI, 11 Novembru 2019(TATOLI)-Pás, justisa no instituisaun efikásia nu´udar pontu ida (16) husi pontu 17 ODS (Objetivu Dezenvolvimentu Sustentável) nian ne´ebé mak país hotu iha mundu kuaze implementa.

Embaixadór Suésia ba Indónezia, Marina Berg konsidera katak bainhira nasaun ida atu atinji ODS 16 ne´e presiza iha kondisaun demokrasia ida ne´ebé mak di´ak nune´e mós governu tenke apoiu ema hotu iha situasaun vulnerável.

“Ita presiza  iha demokrasia ba sosiedade ne’ebé ho kondisaun di’ak ba ema hotu atu partisipa no influénsa desizaun públika. Governu mós tenke garantia direitu uumanu no liberdade fundamentál nune’e mós haforsa no apoiu ema hotu iha situasaun vulnerável iha sosiedade sívil.” hateten Embaixadora Suésia, Marina Berg, iha nia diskursu ba abertura konferénsia internasionál  anuál ODS, iha edifísiu Ministériu Finansa, ohin.

Embaixadora Suésia ba Indónezia ne’ebé mak partisipa iha Konferénsia Internasionál ne’e realsa katak Suésia iha tradisaun ida apoia demokrasia tanba ne’e sei kontinua ho tradisaun ne’e.

“Suésia iha tradisaun naruk ba suporta governu demokrátiku, direitu umanu no organizasaun sosiedade sívil nian no ami sei kontinua halo ida ne’e”.

“Segundu, presiza garantia direitu ne’ebé hanesan ba ema hotu, sosiedade ne’ebé demokratiku no pás tenke aplika baze direitu, foka liubá sira ne’ebé hasoru diskriminasaun nune’e mós ba sira ne’ebé presiza ajuda, protesaun no hakmatek,” kompromete diplomata ne´e.

Embaixadora Marina Berg hatutan, serbisu hamutuk ho grupu ne’ebé bele kauza konflitu importante atu prevene mós konflitu.

“Terseiru, atu promove no manten pás presiza serbisu ho grupu ne’ebé kauza konflitu, igualidade jéneru, inkluzaun ba labarik no klosan, sira ne’e hotu hanesan xave atu prevene mosu konflitu. Feto envolve iha forsa manutensaun pás (peace keeping) ne’e sentrál. Feto barak iha manutensaun pás signifika impaktu barak iha manutensaun pás ne´e”.

“Sweden sei kontinua sai lian ne’ebé forsa no hamriik no proteze direitu humanu, demokrasia, lei tanba ne’e ami deklara ba mundu katak la husik ema ida iha kotuk (globally we declare leave no one behind),” tenik diplomata suéka ne´e.

Notísia relevante:ODS 16 Hanesan Fundamentu Atinje ODS Seluk

Jornalista: Nelia Borges

Editór      : Rafy Belo 

HAKEREK NO HATÁN

Please enter your comment!
Please enter your name here