DILI, 09 Novembru 2019 (TATOLl)—Diretór Eskola Ensinu Sekundária Jerál (ESG) Nicolau Lobato, Marcos Soares Paicheco, informa Eskola Ensinu Sekundáriu Jerál (ESG) Nicolau Lobato hanesan eskola privada ida no harii iha 2003 iha Suku Tibar, Liquiça, ne’ebé hamahon-aan iha Fundasaun Dom Boaventura nia okos.

Diretór ESG Nicolau Lobato, Marcos Soares Pacheco. Foto TATOLI: Nelia Fernandes

Eskola Nicolau Lobato ne’e, nia hatutan, harii iha Tibar-Líquiça hafoin muda fali mai Dili tanba razaun profesór no estudante sira maioria husi Dili mak ba eskola iha Tibar. Entaun, profesór sira deside muda fali mai iha Tasi-Tolu, Dili, iha nafatin Fundasaun Dom Boaventura. Maibé tanba eskola ne’e seida’uk hetan rekoñesementu ka akreditasaun husi Governu entaun profesór sira koko muda eskola nia fundasaun naran Fundasaun Kaer Rasik Kuda Talin.

Tanba eskola ne’e la’o laduun efetivu tanba problema kompleksu ne’ebé fundadór sira la ativu to’o ikus profesór sira iha inklui diretór eskola koko hakbiit no hamoris nafatin eskola ne’e, iha 2011 muda fali fundasaun nia naran ba fali Fundasaun Nicolau Lobato.

Iha momentu ne’ebá, ema na’in lima ne’ebé iha inisiativa maka´as hamoris eskoka refere mak Duarte Bragança, Marcos Soares Paicheco, Rui Lopes, Saboni Ernestu, Lorenço de Deus, hodi fó hanoin hamutuk, fó inisiativa oinsá  atu asegura nafatin eskola ne’e eziste to’o ohin loron. Eskola Ensinu Sekundária Nicolau Lobato rekoñese ona husi Ministériu Edukasaun (ME) hodi halo estatutu kompletu no hato’o ba Ministériu Justisa to’o ikus mai eskola ne’e la’o to’o agora.

Naran: Eskola Ensinu Sekundáriu Jerál (ESG) Nicolau Lobato.

Lokaliza: Iha Tasi-Tolu, Dili, Timor-Leste.

Harii: Husi Fundasaun Dom Boaventura iha 2003 (agora muda ba Fundasaun Nicolau Lobato).

Fundador: Anjelo.

Prezidente Fundasaun Nicolau Lobato Primeiru: Anjelo.

Totál Profesór/a: 50 (Profesór kontratadu Governu: 20, profesór permanente: 10, Voluntáriu husi Eskola: 13, inklui administrasaun 2, ida funsionáriu husi Governu no ida husi funsionáriu husi Eskola, Mate na’in 2, sai na’in 2, reforma 1)

Totál Estudante: Hamutuk ema na’in 928.

Vizaun: Dezenvolvimentu umanu hanesan prosesu edukativu ida ne’ebé sai nu’udar knu’uk matenek no neon badaen ba setór sira seluk.

Misaun: Primeiru, prontu partisipa iha prosesu dezenvolvimentu nasionál iha parte edukasaun no kultura. Segundu, prontu serbisu hamutuk ho Governu RDTL ho objetivu atu eduka, hanorin no motiva jerasaun foun Timor-Leste ne’ebé intelektuál, loialidade, hametin nasionalizmu iha morál no responsabilidade nu’udar sidaudaun ne’ebé di’ak.

Objetivu: Objetivu jerál mak atu sai dezenvolvimentu no umanu ida ne’ebé hanesan edukativu ida, nu’udar knu’uk matenek ba badaen no setór sira seluk.

Fasilidade Eskola: Fundasaun Nicolau Lobato mak toma responsabilidade. Governu apoiu livru bazeia ba kurrikulu matéria, inklui juventude Austrália, ONG ba Futuru, fó livru maioria uja lian Indonézia, maibé iha ligasaun ba matéria no estudante sira-nian, hanesan kona-ba lideransa, matéria Biologia, Kímika.

Sala de aula: Hamutuk 11, sala diretór iha 1, sala laboratóriu iha 1, sala biblioteka iha 1, sala administrasaun iha 1, sala ba profesór iha 1.

Biblioteka: Kondisaun biblioteka hetan apoiu husi juventude Austrália, maibé biblioteka ne’e la tama padraun tanba labele akumula estudante hotu. Bainhira estudante sira presiza livru, profesór sira hakerek naran depois sira ba foti depois entrega fila fali. Internet mós liga tama ba mós tanba sala ne’e naruk  labele akomula estudante 40 maibé akumula de’it ema na’in 10.

Laboratóriu: Iha maibé la funsiona.

Funsionáriu ba halo Limpeza (Cleaner): Iha 1, seguransa 1, ne’e Fundasaun Nicolau Lobato mak fasilita.

Rekursu Umanu Sufisiente:  Iha profesor diploma Sekundária ema na’in 1,  Diploma S3 iha ema na’in 3, S2 iha ema na’in 3, restu maioria ho diploma S1.

Regulamentu ba Profesór no Estudante sira: Eskola Nicolau Lobato profesór sira iha kategoria rua, Funsionáriu Públiku no mós fundasaun mak responsabilidade.

Profesór/a husi fundasaun mak responsabilidade ne’e tuir regulamentu fundasaun ninian. Funsionáriu Públiku ne’e tuir lei funsionáriu públiku. Hanesan profesór/a husi funsionáriu públiku abandona serbisu durante semana ida ka rua la iha justifikasaun ruma, nu’udar diretór halo karta xamada, tenke iha justifikasaun ruma, karik na’in sai bebeik hakarak ka lakohi haruka karta rekomendasaun ba iha diretór edukasaun munisípiu para foti desizaun.

Iha Funsionamentu Konsellu Estudante: Ninia funsaun mak hodi ajuda eskola ninia serbisu,  sira mós bele organiza atividade ruma ne’eb’e lidera husi profesór ida ba Asuntu Estudantil nia okos. Profesór ne’e mak koordena hamutuk atu ko’alia kona-ba matéria estra-kurrikuler hodi halo planu.

Iha Konsellu Profesór: Konsellu profesór, sira ida-idak ida haree sira-nia matéria (disiplina ida, ida) bainhira iha enkontru ne’e mak eskola hasai avizu husi  profesór sira enkontru. Iha opiniaun ka iha hanoin ruma, ne’e ami bele fó sai iha enkontru Konsellu profesór sira.

Komité Jestaun Eskolár (la’os Konsellu Pais): Ami iha ne’e Komitê Jestaun Eskolár, ne’e foin implementa iha eskola haat ne’ebé hetan formasaun husi ONG Ba Futuru ne’ebé fó ba eskola ida ne’e, eskola Atauru, no Eskola Kay Rala.

Komité Jestaun Eskolár ne’e reprezenta estrutura eskola mak diretor da eskola, adjuntu diretór eskola, reprezentante estudante na’in rua mak Xefe Konsellu estudante no ninia sekretaris depois no reprezentante alunus nia inan-aman sira.

Kada tinan, diretór ne’e haklaken, estudante sira ne’ebé sira-nia estudu iha Eskola Ensinu Sekundária Nicolau Lobato ne’e, sira barak mak liu iha UNTL no barak mak ba iha rai li´ur. Tinan-tinan eatudante sira iha ne’e, 100% ezame nasionál sira pasa hotu kuaze 40 Ka 50 asesu iha UNTL

“Ami iha grafika apvovadu husi 2003-2009 ne’e, ami halo avaliasaun ba eskola ema kuaze rihun rua resin mak sai husi ne’e ona. Kada tinan, finalista atus rua ba leten. Balun agora sai doutoramentu ona, sai doutoramentu kuaze na’in rua, tolu ona. Balun sai F-FDTL no Polísia. Iha ami-nia Ministériu Edukasaun ho eskola privada hanesan parseira ida serbisu hamutuk hodi apoiu atu forma juventude iha rai ida ne’e, aban bainrua sai fali lideransa ba rai ida ne’e,” nia esplika.

Notísia relevante:Perfil Eskola Ensinu Sekundáriu Iha Dili: Eskola Ensinu Selundária Jerál São Migual Arcanjo (VII)

Jornalista: Nelia Fernandes

Editór     : Rafy Belo

HAKEREK NO HATÁN

Please enter your comment!
Please enter your name here