Prezidente Timor GAP, EP, Francisco Monteiro. Imajen Egas Cristovão

Viqueque, 08 novembru 2019 (TATOLI) – Prezidente TIMOR GAP, Francisco Monteiro, hateten rekruta ona joven 25 husi suku Maluro, Postu Administrativu Viqueque Vila, Munisípiu Viqueque, ne’ebé daudaun ne’e tuir formasaun iha área espesializada atu sai operadór bainhira konstrui fábrika Gás Naturál Likefeitu (LNG, sigla inglés) iha Beaço tama iha faze produsaun.

“Ami hahú rekruta uluk ho Beaço oan 25 ne’ebé tuir formasaun espesializada iha Tibar iha setór petróleu, sistema saúde ho seguransa ne’ebé importante tebes iha ámbitu ba étika traballu iha indústria atu hetan instrusaun ida hodi buti botaun ida ba fábrika LNG nian,” Francisco Monteiro iha suku Maluro, Viqueque, ohin.

Francisco Monteiro friza formasaun ne’e fó husi empreza espesializada internasionál Ciaelec husi nasaun França ne’ebé servisu hamutuk ho sentru formasaun Tibar.

Nia adianta, bainhira formasaun hotu iha Tibar, formandu 25 ne’e sei halo prátika iha fábrika LNG Bontang iha Kalimantan, Indonésia, durante tinan rua.

TIMOR GAP ho PT. Badak NGL Plant asina ona akordu hodi fasilita timoroan bá hala’o prátika hodi hasa’e abilidade iha área operasaun fábrika LNG nian.

“Ami hili Botang tanba fábrika ida boot la halimar, ne’ebé prodús tonelada millaun 20 pur anu ho fábrika ualu, maibé sei uza neen hodi halo operasaun no rua mak uza ba formasaun de’it ba ema”, afirma.

Tuir planu sei rekruta Viqueque-oan 50 no restu ne’e husi munisípiu 11 inklui Região Administrativa Especial Oecusse-Ambeno (RAEOA) atu to’o alvu ba na’in-250.

“Ita sei kontinua fó formasaun fazeadamente, tinan oin ami haruka 25 depois prepara sira na’in-50 bá tan no tinan tuirmai (2021) no 50 tuir tan to’o 250 to’o tinan 2026”, salienta.

Tuir estratéjia TIMOR GAP, to’o 2026 ne’e Timor-Leste bele iha ema metade ba operadór sira hodi akompaña espesialista sira husi li’ur, hafoin halo tradisaun hodi timoroan kaer mesak.

TIMOR GAP prevee ona millaun $5 iha Orsamentu Jerál Estadu 2020 atu haruka timoroan ba tuir formasaun iha rai-laran no li’ur.

Formandu husi suku Maluro, António Soares, sente kontente sai benefisiáriu ba formasaun ne’e atu hasa’e abilidade hodi bele sai ema espesialista ba operadór iha fábrika LNG ne’ebé sei konstrui iha Beaço.

“Daudaun ne’e, ami na’in-25 nia treinamentu ba faze dahuluk iha área setór petróleu nian, sistema saúde ho seguransa ne’ebé uza indústria finaliza ona no hein atu bá pratika fali iha Indonésia”, dehan.

Maluro oan 25 ne’e kompostu husi mane na’in-17 no feto ualu ne’ebé finaliza ona formasaun iha Tibar.

Notísia relevante : Xanana Agradese Abitante Maluru Apoia Fábrika LNG

Jornalista : Florencio Miranda Ximenes

Editora : Maria Auxiliadora

1 KOMENTÁRIU

HAKEREK NO HATÁN

Please enter your comment!
Please enter your name here