Negosiadór Prinsipál Fronteira Marítima, Kay Rala Xanana Gusmão, kaer liman ho estudante sira iha suku Maluru. Imajen/Florencio M. Ximenes.

VIKEKE, 07 novembru 2019 (TATOLI) – Negosiadór Prinsipál ba Fronteira Marítima, Kay Rala Xanana Gusmão, agradese abitante suku Maluru, Postu Administrativu Vikeke Vila, Munisípiu Vikeke, ne’ebé apoia hodi harii fábrika Gás Naturál Likefeitu (LNG, sigla inglés) iha Beasu.

“Ha’u agaradese tebes tanba prontu husik imi-nia uma no ai-horis sira atu estabelese projetu LNG iha Beasu, ita tenke respeita sira-nia ezijénsia hodi dada duni mai iha ne’e”, afirma Xanana Gusmão ho matan-ween iha ámbitu diálogu ho rezidente suku Maluru, Vikeke, ohin.

Molok Xanana Gusmão halo diálogu ho abitante suku ne’e, halo observasaun direta ba área fábrika LNG no Nova Beasu ne’ebé sei konstrui uma ba populasaun sira.

“Ha’u agradese tebes tanba imi hakarak no prontu husik uma, ha’u laran todan tebes, maibé sente laran kmaan fali bainhira imi prontu partisipa dezenvolvimentu iha ita-nia rai”, katak.

Nune’e, eis Prizente Repúblika ne’e kompromete sei kria ekipa ida atu halo avaliasaun no verifikasaun ba identifikasaun rai no propriedade hodi fó kompensasaun no halo mós identifikasaun ba fatin foun atu halo uma ba abitante sira.

“Ha’u husu ba TIMOR GAP atu halo estudu tan hodi kria kondisaun ne’ebé dignu ba mak sobu imi-nia uma sira atu imi bele bá hela”, Xanana fó hanoin.

Populasaun Maluru Retira Sira-Nia Proposta Kompensasaun Kuaze Millaun $500

Líder Nasionál Kay Rala Xanana Gusmão hatete laran todan tanba antes ne’e simu ona abitante suku Maluru nia proposta sira ne’ebé atu selu kuaze osan millaun $500 ne’ebé seidauk konta ai-horis sira, hafoin husik fatin ne’e.

“Ha’u mai ho laran todan, maibé fila ho laran kmaan tanba imi hakarak retira hotu proposta ne’e, maibé ha’u husu, ami sei kria ekipa ida atu haree imi-nia direitu ne’ebé ami iha devér atu kumpre ka selu ba imi”, nia kompromete.

Xanana Gusmão dehan : Ha’u admira tanba imi bele kuda ai-horis barak, ne’ebé presiza haree didi’ak ida ne’e atu imi bá fali iha área foun bele kria kondisaun ba imi”.

Lia-Na’in suku Maluru, Munisípiu Vikeke, Domingos Hendrique, hatete konsulta ona ho uma lisan 34 iha suku refere hodi deside hamutuk prontu apoia projetu LNG iha Beasu.

“Ami povu ida ne’e prontu bá moris fatin iha ne’ebá (foho leten) naran katak rikusoin ne’ebé maun boot (Xanana Gusmão) luta tenke mai iha Beasu”, katak.

Nia salienta : “Ami la ezije buat barak ba maun boot (Xanana) no ukun-na’in sira, maibé ami husu atu trata ami bele moris ho dignu no hakmatek ne’ebé iha eletrisidade, estrada no bee-moos”.

Nune’e, nia hatutan abitante sira deside dada proposta ne’ebé husu Governu atu selu osan kuaze millaun $500 ne’e, tanba prontu simu ona kadoras mai iha Beasu.

Portavós Juventude, Evangelino Ximenes, reprezenta foinsa’e suku Maluru hatete sira prontu apoia iha kualkér tempu ho Governu atu hahú projetu LNG.

“Ami juventude suku Maluru prontu apoiu iha kualkér tempu para sai husi fatin no ami sei la impede dezenvolvimentu, no ami prontu apoia kualkér oras dada kadoras LNG mai Beasu”, nia afirma.

Reperezenta populasaun aldeia Makaliku no Kaidiu-Bere, Suku Uma Wa’in Leten, Mario Pinto, hatoo parabéns ba Xanana Gusmão tanba luta ba ukun rasik aan durante tinan 24 no luta ba fronteira marítima to’o Timor-Leste manán.

“Ami mós sente todan, maibé ami bele dehan kmaan, funu ida todan ita-boot lidera tanba saida agora labele. Ami prontu simu dezenvolvimentu ida ne’e ba timoroan tomak, ami prontu apoiu 100% atu bá hela iha ne’ebe de’it naran katak ita-boot sira lori Greater Sunrise ka harii fábrika LNG mai iha Beasu”, katak nia ho kontente.

Nune’e, nia dehan prontu atu koopera ho Xanana Gusmão no TIMOR GAP atu harii fábrika LNG iha Beasu.

“Maibé, ami husu karik muda bá fatin foun presiza instala bee-moos, eletrisidade, eskola, estrada no kria kondisaun ba ami atubele halo to’os no natar”, nia hatete.

Xefe Suku Maluru, Francisco Amaral, dehan reprezenta komunidade tomak retira proposta sira ne’ebé hatama ona ba Governu no hahú bá oin prontu ona koopera ho Governu dada kadoras ka konstrui fábrika LNG iha Beasu.

Abitante afetada iha suku rua hanesan Maluru no Uma Wa’in Leten kompostu husi aldeia Loho Oan, Makaloso, Maluru, Makaliku no Kaidiu-Bere ho totál umakain 447. Enkuantu fábrika LNG ne’e presiza ektare 650 no área ba konstrui bairru foun ektare 400.

Notísia relevante : Viqueque-Oan Prontu Koopera ho Xanana ba Projetu LNG Beasu

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here