Prezidente Autoridade Interinu Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), Arsénio Paixão Bano. Imajen Tatoli/Egas Cristóvão.

DILI, 1 agostu 2019 (TATOLI) – Iha loron dahuluk asume kna’ar nu’udar Prezidente Autoridade Rejiaun Administrativa Espesiál Oé-Cusse Ambeno (RAEOA) interinu, Arsénio Paixão Bano relata servisu ba Primeiru-Ministru (PM), Taur Matan Ruak.

“Ha’u hanesan responsável interinu ba loron 120 iha Oé-Cusse, hafoin mandatu eis Prezidente RAEOA, Marí Alkatiri ramata”, nia tenik ba jornalista sira iha Palásiu Governu, kinta ne’e.

Nia agradese tanba Xefe Governu bele simu nia iha Palásiu Governu no informa katak nia servisu la’o nafatin ho normál ba interese Timor-Leste no Oé-Cusse nian.

“Hanesan Prezidente RAEOA interinu, ha’u fó garantia ba Primeiru-Ministru katak saida mak Dr. Marí hahú hanesan Prezidente RAEOA dahuluk la’o nafatin no ba interese povu Oé-Cusse nia servisu presiza la’o nafatin no ha’u iha responsabilidade ba loron 120”, nia dehan tan.

Atuál Sekretáriu Rejionál Edukasaun RAEOA ne’e akresenta, nia kontente no agradese tanba bele priénse vakatura ida ne’e.

“Ha’u la’ós agora mak iha responsabilidade ne’e maibé ha’u servisu ho Dr. Marí durante tinan 9 ona. Povu Timor-Leste no Oé-Cusse sempre aas no ha’u iha responsabilidade atu asume nu’udar Primeiru Sekretáriu iha Autoridade.

Entretantu, Marí Alkatiri ramata ninia mandatu nu’udar Prezidente Autoridade RAEOA iha loron 30 jullu 2019.

Jornalista: Julia Chatarina

Editór: Xisto Freitas

Notísia Relevante: Lei Fó Dalan Arsenio Bano Lidera RAEOA

HAKEREK NO HATÁN

Please enter your comment!
Please enter your name here