Pasaporte Timor-Leste. Foto espesiál

INGLATERRA, 8 novembru 2019 (TATOLI) – Lider komunidade Timoroan iha Inglatera husu ba governu liuhosi ministériu justisa no negosiu estranjeiru no kooperasaun atu haruka ekipa téknika, hodi tulun timoroan sira ne’ebé pasaporte termina ona ninia-tempu.

MJ Sei Loke Atendimentu Pasaporte iha Nasaun Haat

“Família sira ne’ebé mak mai ho pasaporte Timor iha UK (Inglaterra) ne’e, liuliu labarik ho idade ki’ik tanba inan aman iha konfiansa ba oan sira atu hetan sidadaun portugés, maibé to’o ikus la sai até agora. Inan aman sira hein to’o passporte Timor mos expire (termina nia tempu validade) de’it. Oan sira atu ba halo study tour (vizita estudu) iha rai liur mos la-di’ak tanba dokumentu”, hatete Rui Pires nu’udar lider komunidade Timoroan iha Northwich.

Nia dehan pedidu ne’e sujere iha outubru 2018, maibé seidauk hetan klarifikasaun to’o agora. “Ami kompriende katak kada ministériu oras ne’e servisu barak, ami la’ós pasiar maibé servisu, ami mos halo kontribuisaun ba dezenvolve rai doben Timor”.

Prezidente komunidade Timor iha Bridgwater, Januario Gusmão, husu ba governu atu konsidera preokupasaun ne’e ba prioridade 2020.

“Númeru atu renova pasaporte Timor iha sidade Bridgwater kuaze lubuk ida, seidauk konta ho sidade seluk. Tan ne’e hanesan prezidente komunidade fiar katak governu Timor liuhosi Primeiru-Ministru, Taur Matan Ruak, bele rona ami nia preokupasaun hirak ne’e”, afirma.

Tuir nia, Inglaterra potensia ba dezenvolvimentu iha Timor. “Mesmu ami dook, maibé ami nia ispíritu nasionalizmu sempre iha rai doben Timor. Ami apresia bainhira ita nia Primeiru-Ministru, Taur Matan Ruak, ou membru governu bele hakat mai haree nia povu sira iha Reinu Unidu (Inglaterra)”.

Nune’e mós Felix de Jesus, Prezidente Ezekutivu TAIS (Timorese Association Inclusive Support) Irlandia do Norte, afirma Estadu Timor iha obrigasaun legál atu proteje ninia emar-sira.

“Ekipa ida husi Timor presiza mai lalais atu avalia situasaun ne’e hodi proteje sidadaun, liuhusi renovasaun pasaporte no mós salvaguarda imajen Timor-Leste perante situasaun atuál”, katak nia.

Felix hatuir ninia parte husu ona ba governu no mós reprezentante Estadu TL iha Londres, liuhosi karta ne’ebé dirije iha loron 26 fulan-outubru 2018, maibé seidauk hetan resporta formál ruma.

“Laiha dalan seluk, di’ak liu ministériu justisa tenke haruka ekipa ida mai UK (Inglaterra) renova pasaporte titulár. Timoroan sira iha UK presiza tebes Estadu Timor nia intervensaun”.

Kontribuente: Celso Oliveira

Editora: Rita Almeida

HAKEREK NO HATÁN

Please enter your comment!
Please enter your name here