Ministru Justisa, Manuel Cárceres da Costa. Imajen/Antonio Goncalves

DILI, 06 novembru 2019 (TATOLI)-Iha tinan 2020, Ministériu Justisa (MJ) sei loke atendimentu emisaun no renovasaun pasaporte eletróniku Timor-Leste nian iha nasaun haat, mak hanesan Portugal, Reinu Unidu, Korea do Sul ho Australia.

MJ sei destaka ninia pesoál ka adidu iha embaixada Timor-Leste nian  iha nasaun haat ne’e atu bele fó atendimentu ba povu Timor-Leste ne’ebé namkari lemo-lemo iha nasaun sira ne’e nia laran.

Ministru Justisa (MJ), Manuel Cárceres da Costa, hateten, iha ona hanoin hosi MJ atu tinan oin hahú instala ekipamentu emisaun no renovasaun pasaporte Timor-Leste  nian iha nasaun haat.

“Ha’u mós  simu ona lamentasaun iha media sosiál (Facebook) hosi sidadaun timoroan iha rai li’ur  katak estadu la tau matan ba sira, ita bele ajuda ita nia maluk sira liuhosi kazu por kazu, tanba ne’e ita hanoin ona iha tinan oin bele loke mós atendimentu pasaporte iha nasaun hirak ne’e,” informa Ministru Manuel Cárceres  da Costa, ohin, hodi responde Ajénsia TATOLI iha Palásiu Governu.

Nia  husu ba timor-oan sira ne’ebé  hakarak atu sai ba rai li’ur tenke haree pasaporte ne’e bainhira mate, kuandu pasaporte atu mate tenke hatene hodi mai fali renova iha fatin ne’ebé emite ba.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here