Vise-Governadór Banku Central Timor-Leste (BCTL),Venancio Alves Maria. Imajen /Jogerjo Guterres.

DILI, 08 novembru 2019 (TATOLI) – Fundu Mina-rai Timor-Leste (TL) iha trimestre datoluk ne’ebé termina iha 30 setembru 2019 hamutuk biliaun US$17,55, haktuir relatóriu  ne’ebé fó sai husi Banku Sentrál Timor-Leste (BSTL).

“Informasaun sira ne’ebé kobre iha trimestre ne’e hatudu katak kapitál fundu biliaun $17,55. Reseita ne’ebé tama hosi taxa no royalty (realeza) durante trimestre ida ne’e millaun $166,70 no osan ne’ebé sai durante trimestre ida ne’e millaun $203,24 kompostu hosi millaun $200 transfere ba Orsamentu Jerál Estadu no millaun $3,2 kobre ba kustu jestaun”, Vise-Governadór BSTL, Venancio Alves Maria, iha lansamentu relatóriu trimestrál Fundu Petróleu iha sala enkontru BSTL, ohin.

Reseita ne’ebé tama ne’e, mai husi kontribuisaun kontribuinte sira ba fundu hamutuk millaun $86,54 no pagamentu royalty simu husi Autoridade Nasionál Petróleu millaun $80,16.

Venancio haktuir tan, haree ba rendimentu iha trimestre ida ne’e hamutuk millaun $138,62 iha setembru 2019 ne’e.

“Se ita haree ba totál rendimentu durante tinan ida hosi janeiru to’o 30 setembru 2019 hetan rendimentu biliaun $1,5. Aproveita mós oportunidade ida ne’e atu informa mós katak iha trimestre ida ne’e bazeia ba desizaun sira halo antes kona-ba investimentu iha equity factor karteira asaun fahe ona ba iha rua, ida maka market equity no ida seluk factor equity ne’e efetivamente implementa iha inísiu agostu 2019, más la muda kompozisaun asaun ninian no muda de’it ninia implementasaun”, Venancio esklarese.

Vise-Governadór esplika Fundu Mina-rai iha mudansa uitoan de’it tanba merkadu trimestre ida ne’e afavór.

“Valuasaun ne’e pozitiva hanesan valuasaun ba merkadu millaun $102 ita hetan mudansa valór pozitiva durante ida ne’e no só hetan de’it movimentu kambiál ne’e ki’ik, ita hetan de’it millaun $1,42 no transferénsia trimestre ida ne’e mós ki’ik mak millaun $200 tanba ne’e maka kombinasaun transferénsia millaun $200 iha trimestre ida ne’e, más rendimentu ne’ebé ita hetan millaun $139,62 ne’e kobre fali transferénsia tanba ne’e maka mudansa ki’ik”.

Iha lansamentu relatóriu ne’e partisipa mós hosi parte Ministériu Finansa no sosiedade sivíl.

Iha relatóriu BSTL nia antes ne’e, Fundu Mina-Rai Timor-Leste nian iha trimestre ne’ebé termina iha loron 30 juñu 2019 sa’e ba biliaun U$17,45 kompara ba trimestre dahuluk mak U$16,98.

Vise-Governadór Venancio Alves Maria hatete reseita ne’ebé simu durante trimestre ne’e hamutuk millaun $192,47 ne’ebé kompostu hosi kontribuisaun kontribuinte sira ba fundu hamutuk millaun $71,43 no pagamentu royalty simu hosi Autoridade Nasionál Petróleu (ANP) hamutuk millaun $121,03.

Notísia relevante : Fundu Mina-Rai Timor-Leste Sa’e ba Biliaun U$17,45

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here