Vise-Governadór Banku Central Timor-Leste (BCTL),Venancio Alves Maria. Imajen /Jogerjo Guterres.

DILI, 02 agustu 2019 (TATOLI)-Fundu Mina-Rai Timor-Leste nian iha trimestre ne’ebé termina iha loron 30 juñu 2019 sa’e ba biliaun U$17,45 kompara ba trimestre dahuluk mak U$16,98.

Vise-Governadór Banku Central Timor-Leste (BCTL),Venancio Alves Maria, hatete reseita ne’ebé simu durante trimestre ne’e hamutuk millaun $192,47 ne’ebé kompostu hosi kontribuisaun kontribuinte sira ba fundu hamutuk millaun $71,43 no pagamentu royalty simu hosi Autoridade Nasionál Petróleu (ANP) hamutuk millaun $121,03.

“Osan ne’ebé sai hosi fundu durante trimestre ne’e hamutuk millaun $224,11 kompostu hosi millaun $220 transfere ba Orsamentu Estadu no millaun $4,11 ba kustu jestaun”, Venancio Alves Maria informa iha lansamentu relatóriu Fundu Petrolíferu iha edifísiu BCTL, avenida Bispo Medeiros, ohin.

Vise-Governadór ne’e hatutan, rendimentu portfolio en termu dólar, hahú hosi janeiru to’o 30 juñu 2019, Fundu Petróleu hetan rendimentu totál biliaun $1.4. No rendimentu iha trimestre ida ne’e de’it hamutuk millaun $494,68.

“Se ita sura ba ninia persentajen, nia rendimentu karteira 2,94% kompara ho ninia rendimentu referénsia mak porsentu 3,02”.

Official Investment BCTL, Agostinho Maia, Imajen /Jogerjo Guterres.

Official Investiment BCTL, Agostinho Maia, esplika situasaun merkadu durante trimestre ne’e di’ak tanba folin ativu sa’e maka’as maka rezulta retornu pozitivu.

“Retornu pozitivu sira ne’e suporta hosi mudansa polítika banku sentrál liuliu mudansa polítika banku sentrál prinsipál sira ninia polítika monetária ba kondisaun ne’ebé mak akomodativu liu, liuliu banku sentrál sira hanesan Estadu Unidu Amérika no banku sentrál Europeia nian”, dehan Agostinho Maia.

Nia subliña, mudansa polítiku sira ne’e tanba haree ba dadus atividade ekonomia globál sira ne’ebé mak fraku durante trimestre ne’e, tanba ne’e maka banku sentrál sira muda sira-nia polítika monetária atubele suporta nafatin atividade ekonomia sira ne’e hodi mantén kreximentu ekonomia globál.

“Mudansa ba dadus atividade ekonomia sira ne’ebé fraku ne’e kauza hosi fatór sira hanesan disputa komérsiu entre Estadu Unidu Amérika ne’ebé maka agora sei kontinua nafatin hodi rezulta destruisaun (gangguan) ba atividade negósiu globál nian. Tanba ne’e maka fó impaktu maka’as ba nasaun sira ne’ebé tau sira-nia atividade esportasaun ne’e tun maka’as”.

“Ida fali mós siklu ekonomia entaun ema haree katak siklu ne’e komesa maduru ona istórikamente dadus hateten katak ekonomia ne’e kuandu di’ak durante tinan sanulu ne’e sempre iha resesaun”, Agostinho katak.

Jornalista: Antónia Gusmão

Editora : Maria Auxiliadora

1 KOMENTÁRIU

HAKEREK NO HATÁN

Please enter your comment!
Please enter your name here