Estudante ES São Pedro Comoro. Imajen: Jogerjo Guterres

SAME, 08 novembru 2019 (TATOLI)-Estudante Eskola Ensinu Sekundáriu (ES), São Pedro, Comoro-Dili, aplika teória sismógrafu ne´ebé aprende iha matéria jeolojia, ne´ebé sira aprende iha eskola, hodi sukat amplitude no deteta ondas rai-nakdoko, liuhusi aprezentasaun ba públiku, iha ámbitu komemorasaun loron mundiál siénsia no matemátika “ ba pás no dezenvolvimentu”.

Membru grupu husi Eskola ES São Pedro, Monaleste Meinsy Sarmento. Imajen: Jogerjo Guterres

Membru grupu husi Eskola ES São Pedro, Monaleste Meinsy Sarmento hateten, prátika sismógrafu ne’e sira foin implementa semana rua molok partisipa iha kompetisaun loron mundiál siénsia  no matemátika nian tanba antes ne’e sira hetan de’it mak teória.

“Ami durante ne’e hetan de’it mak teória maibé depois tama iha ezame  mak ami foin apresia fali teória ne’e,” haktuir  membru grupu ne’e ba Ajénsia TATOLI iha munisípiu Manufahi-Same, ohin.

Nia dehan,  amplitude atu sukat ondas husi rai nakdoko nian tenke iha sentru  rua ne’ebé hanaran Hypo sentru no Epy sentru, ne’ebé sei hamosu ondas rua mak primáriu no Sekundáriu. Ondas primáriu ninia velosidade lais liu kompara ho ondas sekundáriu.

Tanba ne’e mak atu hateten amplitude ka ondas husi rai-nakdoko nian iha aparrelu rua ne’ebé sei uza atu hateten volume husi rai nakdoko mak hanesan aparelu sismografu no sismometru. Aparellu sismografu  ne’e manuál no aparellu sismumetru mak automátiku.

Estudante ne’e dehan material sismografu ne’e sira hetan husi decimo ano nian tanba antusiazmu hakarak hatene estudante sira buka ninia referensia husi You Tube depois mak sira tenta aplika.

“Ami koko halo prátika beibeik durante semana rua kona-ba aparellu manuál ne’e maibé ikus mai hetan duni ninia rezultadu di´ak,” friza alunu ne´e.

Iha komemorasaun loron mundiál ba siénsia no matemátika ne´e, eskola sekundária São Pedro iha tópiku sia mak sira aprezenta mak hanesan bomba elétriku, resiklazen lixu plástiku, monografu, makina elevadór lixu, aspiradór, makina tesi du’ut, fugaun solár, gama husi lixu no Blender Manuál.

Notísia relevante:UNESCO TL Realiza Kompetisaun Siénsia No Matemátika

Jornalista: Tomé Amado

Editór     : Rafy Belo

 

HAKEREK NO HATÁN

Please enter your comment!
Please enter your name here