Koordenadór SESIM-sentru estudu Siensia no matemátika-no komisaun nasionál Timor-Leste ba UNESCO/Luís NÍvio de Fátima Soares

DILI, 07 novembru 2019 (TATOLI)—UNESCO (United Nation Educational, Scientific and Cultural Organization) Timor-Leste liuhusi eventu Komemorasaun Loron Mundiál Siénsia  no Matemátika ba pás no dezenvolvimentu fó oportunidade ba estudante Ensinu Báziku Terseiru Siklu Sekundária no Ensinu Superiór sira hodi partisipa iha kompetisaun hakerek atividade prátika.

Koordenadór Sentru Estudu Siénsia no Matemátika no Komisaun Nasionál Timor-Leste ba UNESCO, Luís Nívio de Fátima Soares, hateten husi kompetisaun ne’e rasik loke uluk oportunidade ba partisipante sira atu aprezenta sira-nia dokumentu hodi halo selesaun hafoin mak tama iha aprezentasaun.

“Ita hakarak hateten grupu estudante sira ne’ebé tuir mesak hotu ona vensedór iha eventu hanesan ne’ebé realiza ona iha tinan kotuk. Ágora tanba sira komprende ona mekanizmu kompetisaun. Ne’eduni ita fó fali tópiku foun sira mak dezenvolve rasik,” dehan Koordenadór Sentru Estudu Siénsia  no Matemátika no Komisaum Nasionál Timor-Leste ba UNESCO, Luís Nívio de Fátima Soares, ba Ajensia TATOLI  liuhusi entrevista iha Suku Letefoho, Same Vila,  kinta (07/11/2019).

Notísia relevante:UNESCO Lansa Livru Edukasaun Ba  Mudansa Klimátika

Husi aprezentasaun iha kompetisaun ne’e, nia dehan, ekipa juri sira sei tulun sira tanba juri sira ne’ebé mak komisaum organizadora koloka iha kompetisaun ne’e mesak espertu ba siénsia matemátika.

Entaun, nia dehan, juri sira nia papel mak atu tulun partisipante sira hodi halo fali esplikasaun sientífiku karik partisipante sira la domina linguazen siénsia nian.

Iha tinan ne’e, nia informa, komisaun organizadora simu lista grupu hamutuk 74 maibé hafoin halo selesaun dokumentu iha grupu 50 de’it mak aprovadu hodi tuir kompetisaun.

Klasifikasaun husi grupu sira ne’e, nia relata, kompostu husi Ensinu Sekundária Jerál 32, Ensinu Báziku Terseiru Siklu 14 inklui Ensinu Superiór 3 husi Universidade Nacional Timor Lorosa’e, Fakuldade Edukasaun, Arte no Umanidade (FEAU).

Nia informa, eventu kompetisaun ne’e úniku Munisípiu Aileu mak la marka prezensa maibé partisipante sira seluk ne´ebé liu selesaun antuziasmu tebes tuir kompetisaun refere. Agora totál partisipante sira ne’ebé partisipa iha kompetisaun ne’e kuaze 400 resin inklui mestre sira.

“Ha’u observa sira ativu loos iha eventu ne’e tanba hotu-hotu mai ho ida-idak nia preparasaun no hakarak atu hetan tan esperiénsia foun iha prosesa akampamentu ne’e rasik,” nia dehan.

Notísia relevante:UNESCO Apoia Formasaun Multimedia ba DKS UNITAL

Jornalista : Tomé Amado

Editór     : Rafy Belo 

HAKEREK NO HATÁN

Please enter your comment!
Please enter your name here