Zebra Cross. Imajen/Natalino Costa.

DILI, 08 novembru 2019 (TATOLI) – Xefe Departamentu Sinál no Tránzitu Diresaun Nasionál Transporte no Terrestre (DNTT), Ministériu Transporte no Komunikasaun, João Eugénio da Silva, informa DNTT foti ona desizaun hodi hapara provizóriu atividade empreza Bioleta ne’ebé demarka “zebra cross” .

Razaun DNTT hapara kompañia ne’e nia atividade tanba atu haree kualidade tinta ne’ebe pinta zebra croos ne’e ho loloos.

“Ami-nia ministru foin daudaun ba Parlamentu, deputadu sira mós levanta asuntu ne’e hanesan ita-boot husu katak tanba sá zebra cross pinta tiha la to’o loron tolu ka haat sai metan fali, signifika kualidade tinta maka la di’ak ka oinsá”, haktuir nia ba Ajénsia Tatoli iha nia knaar fatin Balidi, ohin.

Ho situasaun ne’e, DNTT mós preokupa empreza nia serbisu, nune’e maka deside hodi hapara provizóriu no atu garante kualidade tinta maka DNTT bolu kompañia hodi pinta estrada iha DNTT oin hodi justifika  kualidade tinta nian.

“Ida ne’e maka horiseik ami bolu kompañia mai loraik, haruka sira pinta iha oin ne’e husi tuku hitu kalan, kuaze ami-nia diretór jerál, diretór administrasaun, diretór aprovizionamentu tékniku sira, ami iha ne’e hotu hodi asiste loloos katak tinta ne’ebé maka sira uza sukat ho temporáriu ne’ebé tenke manas di’ak atu labele estraga”, dehan nia.

Tuir xefe departamentu katak empreza uza tinta ho marka AASHTO M249-98, bazeia ba rekomendasaun husi DNTT liuhosi prosesu konkursu.

“Kompañia tenke uza tinta ne’ebé kualidade di’ak ho marka AASHTO M249-98, tanba tinta hetan ona sertifikasaun iha Malázia”, katak nia.

“Maibé, kompañia hateten katak zebra cross ne’ebé pinta tiha maka metan fali tanba kauza husi ambiente, tanba ita-nia ne’e kada vés, loron manas demais no kauza mós kualidade alkatraun tanba asphalt nabeen sa’e no fo’er, entaun buat sira ne’e hotu pinta tiha metan fali”, haktuir.

Entretantu, empreza halo nia atividade demarkasaun ba pasadeira iha kapitál, hahú iha outubru tinan ne’e.

Notísia relevante : Empreza Bioleta Hahú Remarka “Zebra Cross” 275 Iha Kapitál

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here