VIQUEQUE, 07 novembru 2019 (TATOLI)–Viqueque-oan sira prontu koopera ho Xefe Negosiadór Prinsipál Fronteira Timor-Leste, Kayrala Xanana Gusmão, atu alkansa projetu Gas Natural Likefeitu (LNG-sigla Inglés) mai Beasu, Viqueque.
“Ha’u hanoin kona-ba dezenvolvimentu ekonómika iha Suku Beasu, Munisípiu Viqueque, ami prontu kolabora ho maun Xanana ba Planu Estratéjika Dezenvolvimentu Nasionál (PEDN) liuliu dada kadoras mai ria maran Timor-Leste,” afirma Administradór Munisípiu Viqueque, Gregorio Henrique ba Ajénsia TATOLI, iha sala administrasaun Munisípiu Viqueque, kuarta (06/11/2019).
Oras ne’e Xanana hamutuk hela ho autoridade Viqueque-oan sira iha Beasu hodi ko’alia ba malu no introdús vantajen hosi projetu LNG Beasu. Xanana espera, Viqueque-oan sira bele apoia polítika Governu hodi dudu lalais preparasaun hotu kona-ba nesesidade projetu LNG nian.
Munisípiu Viqueque iha Postu lima, kompostu hosi Postu Administrativu Lakluta, Uatulari, Uatocarbau, Viqueque Vila no Ossu no suku 35 ho total populasaun 90.639.
Jornalista : Domingos Piedade Freitas
Editór : Francisco Simões
