Prezidente TIMOR GAP, Francisco Monteiro. Imajen Tatoli/António Gonçalves.

DILI, 05 novembru 2019 (TATOLI) – Prezidente TIMOR GAP, Francisco Monteiro, hateten daudaun ne’e, halo ona identifikasaun rai no propriedade abitante afetada sira ba projetu Gás Naturál Likefeitu ka Liquefied Natural Gas (LNG) iha Beasu, Vikeke, hafoin ekipa interministeriál halo tiha ona konsulta iha jullu 2019.

“Ami ho ekipa interministeriál halo ona konsulta ba abitante afetada sira, hafoin finaliza mak tama ba faze identifikasaun ba komunidade hira mak afetadu hodi kompensa iha tinan oin (2020)”, Prezidente TIMOR GAP ba Ajénsia Tatoli iha Parlamentu Nasionál, tersa ne’e.

Francisco Monteiro dehan, daudaun prosesu identifikasaun la’o hela ne’ebé finaliza mak haree no hatene loloos uma no abitante hira mak afeta husi projetu ida ne’e.

“Nune’e mós rai hira mak ita presiza liberta, ne’e depois faze identifikasaun, pur tantu inísiu 2020, ita bele hatene ona ida ne’e”, katak.

Líder empreza Estatál Timor-Leste ne’e dehan sobre kria kondisaun ba rezidente sira, kestaun ne’e sei iha prosesu laran, ne’ebé presiza trata neineik no rezultadu ikus mosu iha inísiu 2020. “Maibé rai ne’ebé ita presiza ba planta LNG ne’e mais ektare 600”, afirma.

Oitavu Governu liuhusi ekipa interministeriál lansa programa sosializasaun ba identifikasaun rai no propriedade ba área Timor-Leste LNG iha Beasu, Munisípiu Vikeke, ne’ebé aprezenta mós benefísiu husi projetu LNG husi ekipa TIMOR GAP.

Ekipa interministeriál ne’e, ezekuta programa hanesan rai no propriedade iha área konstrusaun projetu LNG hodi asegura fatin projetu liuhosi análize ba terrenu ne’ebé iha ona ho ninia karakterístika, hanesan abitasaun, atividade agríkola no mós fatin kultura no sagradu no análize ba kompensasaun ba populasaun ne’ebé afetada husi projetu ne’e, bazeia ba lejizlasaun ne’ebé vigora.

Projetu konstrusaun fasilidade marina ne’e, hola parte mós iha Greater Sunrise.

Atu fasilita projetu marina ne’e, TIMOR GAP iha ona akordu komersiál ho kompañia xineza ho naran China Civil Engineering Construction Corporation (CCECC) ho orsamentu millaun $943.

TIMOR GAP hanesan entidade Estadu nian ne’ebé hetan fiar husi Estadu liuhosi Governu atu jere no ezekuta komersialmente projetu Greater Sunrise nian.

Ekipa interministeriál ne’e envolve husi TIMOR GAP, Ministériu Obra Públika (MOP), Ministériu Agrikultura no Peska (MAP), MPRM, Sekretáriu Estadu Terra no Propriedade (SETP), no Sekretáriu Estadu Arte no Kultura (SEAK).

Notísia relevante : Timor Gap Sosializa Benefísiu Projetu LNG Ba Komunidade Vikeke

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here