Ekipa Interministeriál sosializa no lansa programa ba projetu Timor-Leste LNG iha Beasu. Imajen/ MOP

DILI, 16 jullu 2019 (TATOLI)-Timor Gap halo sosializasaun ba komunidade sira kona-ba benefísiu hosi projetu Timor-Leste Liquefied Natural Gas (LNG) no rai ne’ebé sei afeta hosi projetu bainhira dada kadoras mina mai Beasu, iha munisípiu Vikeke.

Komunikadu ne’ebé Tatoli asesu, ohin, katak hafoin governu liuhosi ekipa interministeriál lansa programa sosializasaun ba identifikasaun rai iha área Timor-Leste LNG, au mezmu tempu Timor Gap aprezenta benefísiu hosi projetu LNG no rai ne’ebé sei afeta hosi projetu, iha suku Maluru, Postu Administrativu Vikeke, Munisípiu Vikeke.

Antes ne’e, Prezidente Timor Gap, Francisco Monteiro, esplika Timor Gap ho liña ministeriál hahú halo ona identifikasaun ba rai, nune’e bele avansa ona ba prosesu realokasaun no fó dalan ba konstrusaun projetu fasilidade marina iha Beasu, nune’e mós ba planta LNG bele hala’o iha tinan oin.

Atu fasilita projetu marina, nia re afirma katak Timor Gap iha ona akordu komersiál ho kompañia Xineza ho naran China Civil Engineering Construction Corporation (CCECC) ho orsamentu millaun $943.

Aleinde ne’e, ekipa interministeriál hamutuk ho Timor Gap inklui autoridade lokál sira identifika no análize kompensasaun ba populasaun ne’ebé afetadu hosi projetu LNG, bazeia ba lejizlasaun ne’ebé vigora.

Nune’e, ekipa ne’e nia servisu maka atu ezekuta programa hanesan rai no propriedade iha área konstrusaun LNG, hodi asegura fatin projetu liuhosi análize iha terrenu ho nia karaterístika hanesan abitasaun, atividade agríkola, fatin kultura no sagradu.

Programa sosializasaun ne’e hetan partisipasaun hosi Komandante Polisia Nasionál Timor-Leste (PNTL) Munisípiu Vikeke, veteranu sira, lia-na’in no abitante sira iha suku Beasu.

Timor Gap hanesan entidade Estadu nian ne’ebé hetan fiar hosi Estadu liuhosi governu atu jere no ezekuta komersialmente projetu Greater Sunrise nian.

Sosializasaun no lansa programa identifikasaun rai iha área Timor-Leste LNG husi ekipa interministeriál ne’e envolve hosi Ministru Obra Públika, Salvador Eugénio Soares dos Reis Pires, Ministru Agrikultura no Peska (MAP), Joaquim José, eis Ministru Petróleu no Rekursu Minerál (MPRM), Alfredo Pires, Sekretáriu Estadu Rai no Propriedade (SETP), Mariano Ximenes, Sekretáriu Estadu Arte no Kultura (SEAK), Teófilo Caldas, inklui reprezentante hosi Prezidente Timor Gap, Domingos Lequisiga Maria.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here