DILI, 06 novembru 2019 (TATOLI)-Iha proposta Orsamentu Jeral Estadu (OJE) tinan 2020 nian, Ministériu Solidariedade Sosiál no Inkluzaun (MSSI) tau millaun rua dollar Amerikanu hodi fó apoiu ba instituisaun solidariedade sira atu hatutan servisu asisténsia no protesaun ba ema kbiit laek sira.
Notísia Relevante : MSSI Apoia $1,388.711.00 Ba Instituisaun Solidariedade Sosiál 35
Vise Ministra Solidariedade Sosiál no Inkluzaun, Signi Chandrawati Verdial, informa, ohin, hafoin audiénsia ho Komisaun F, C ho E Parlamentu Nasional katak, tinan-tinan MSSI sempre aloka orsamentu jerál estadu liuhosi fundu transferénsia públika ba instituisaun solidariedade sosiál sira hodi tau matan ba orfanatu sira, defisiénsia sira, oan ki’ak no seluk tan ho objetivu atu fó protesaun ba sira hodi garante sidadaun sira nia diretu hanesan.
Ba daudaun ne’e MSSI simu ona proposta husi Instituisaun solidariedade hamutuk 54. Nune’e, ekipa tékniku MSSI nian halo hela verifikasaun no avaliasaun ba proposta hirak ne’e hodi bele hatene proponente ne’ebé mak merese atu asesu ba fundu ne’e iha tinan oin.
Daudaun ne’e mós MSSI elabora hela mata dalan ida hodi halo monitorizasaun di’ak liután ba ezekusaun fundu transferénsia públiku hosi MSSI ba instituisaun solidariedade sira ne’e.
Jornalista : Nelson de Sousa
Editór : Francisco Simões
