DILI, 06 novembru 2019 (TATOLI)-Ministériu Solidariedade Sosiál no Inkluzaun (MSSI) ezekuta ona Orsamentu Jerál Estadu (OJE) tinan fiskál 2019 to’o 92.9%. Tanba ne’e, molok tinan ikus 2019 nian, MSSI bele ona atinje 100% ezekusaun.
Notísia Relevante : MSSI Tau Millaun Rua Apoiu Instituisaun Solidariedade Sosiál
Alokasaun orsamentu ba MSSI iha tinan 2019 nian ho total orsamentu orijen $56,505,642.00, kompromisu $295,897.06, obrigasaun $1,078,710.46, atuál $51,441,140.13 no balansu $3,689,894.35.
Liuhosi audiénsia konjunta ho Komisaun C, E, F Parlamentu Nasional, ohin, Ministra Solidariedade Sosiál no Inkluzaun, Armanda Berta dos Santos, hateten, ezekusaun orsamentu MSSI nian tinan-tinan sempre la’o di’ak.
Biban ne’e, MSSI aprezenta mos proposta OJE 2020 nian ba Komisaun sira PN nian ne’ebé prevee hamutuk millaun $59, hodi kobre ba saláriu vensimentu millaun $1.7, bens servisu millaun $6.2, transferénsia públika millaun $50 ho kapitál menór purvolta milaun $1.
Vise Ministra MSSI, Signi Chandrawati Verdial, hateten, montante orsamentu ne’ebé MSSI prevee ba 2020 nian atu aloka ba kontinuasaun programa ministériu nian ba servisu asisténsia no protesaun sosiál ba povu. Nune’e mós programa prioridade MSSI nian lubuk ida ba tinan oin maka kontinua asegura sustentabilidade institutu seguransa sosiál, promove inkluzaun sosiál grupu hotu ne’ebé vulneravel sira bele hola parte iha dezenvolvimentu no planu sira seluk tan.
Membru PN Veneranda Lemos husu MSSI atu presiza tau atensaun ba problema sosiál tanba ema ki’ak atu nune’e ezekusaun orsamentu bele benefisia liu ba povu.
Jornalista : Nelson de Sousa
Editór : Francisco Simões
