Xefe Estadu Maiór Jenerál F-FDTL, Majór Jenerál Lere Anan Timur. Imajen Tatoli/António Gonçalves

DILI, 06 novembru 2019 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur hateten planu rekrutamentu ba membru forsa armada foun, sei mantein fó prioridade ba veteranu no antigu kombatente libertasaun nasionál nia oan. 

Lere hato’o asuntu ne’e, hafoin enkontru regulár ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité,  Dili, ohin.

Lee mós: Governu Aprova Rekrutamentu Soldadu F-FDTL Na’in-600 ba Tinan Oin

Nia dehan, durante enkontru, informa ba Xefe Estadu katak planu rekrutamentu ne’ebé sei realiza iha janeiru tinan oin, oras ne’e forma ona komisaun foun ida xefia husi Xefe Estadu Maiór.

“Komisaun ne’e maioria mai husi forsa defeza, prezidente mak Xefe Estadu Maiór, envolve mós ofisiál superiór sira inklui ofisiál kapitaun sira”, Lere hateten.

Oras ne’e daudaun, nia haktuir, ekipa ne’e elabora hela kritéria ba rekrutamentu ne’e, maski la sita detallada, maibé Lere dehan, iha kritéria kuaze ualu, ne’ebé ida mak tenke rekruta ema timoroan iha nasionalizmu no patriotizmu ba rai ida-ne’e, eseptu sira ne’ebé moras HIV/SIDA no defisiente.

“Ami elabora kritéria atu haruka ba Governu hodi hetan aprovasaun husi Konsellu Ministru, nune’e ami bele serbisu tuir kritéria ne’e”, nia relata.

Lere hatutan, kritéria ne’e tenke sidadaun Timor ne’ebé iha nasionalizmu, tanba kestaun defeza la hanesan ho instituisaun sira seluk atu troka kada tinan lima.

Bainhira husu kona-ba deklarasaun Vise Xefe Estadu Maiór F-FDTL, Falur Rate Laek ne’ebé antes ne’e dehan la fó prioridade ba veteranu nia oan, Lere hateten, buat ne’ebé ninia vise ko’alia husik ko’alia ba, maibé prioridade nafatin ba veteranu nia oan.

“Buat ne’ebe ha’u nia vise ko’alia, ha’u lakohi ko’alia barak, tanba militár ami iha ierárkia, ami iha komandu. Kestaun Kona-ba buat ne’ebé nia ko’alia ona ne’e husik nia ko’alia ba, maibé ha’u hakarak hateten katak se oras ne’e daudaun timoroan hotu hanesan de’it, entaun haruka Sekretáriu Estadu asuntu Kombatente atu taka tiha Komisaun Verifikasaun ne’e. Se ita hanesan de’it, entaun tanbasá mak ita ba halo fali verifikasaun. Verifika ne’e atu oinsá bele hatene katak o ne’e klandestina nia ema, o ne’e rezisténsia nia ema, o uluk lakohi ukun aan. Tanba ida-ne’e mak ita estabelese Komisaun Verifikasaun ne’e”, nia esplika.

Lere mós informa katak, molok ne’e, rekrutamentu sempre hetan apoiu husi asesór internasionál, maibé tinan ne’e instituisaun ne’e halo rasik tanba fásil.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here