Sekretáriu Estadu Formasaun Profisionál no Empregu (SEFOPE), Julião da Silva, hamutuk ho partisipante sira dere babadok hodi loke Konkursu Nasionál Aptidaun, iha Salaun Dom Bosco, Komoro, Dili, Kuarta (6/11/2019). Imajen TATOLI/Antónia Gusmão.

DILI, 06 novembru 2019 (TATOLI) – Diretora Nasionál Institutu Nasionál Dezenvolvimentu Mão de Obra (INDMO), Isabel Fernandes de Lima, hateten realizasaun Konkursu Nasionál ba Aptidaun (KNA) sai mós hanesan sasukat ida hosi indústria.

“No sira ne’ebé utiliza traballadór iha servisu fatin katak implementasaun sistema formasaun profisionál tuir duni indústria nia hakarak ka lae”, hateten Isabel Fernandes de Lima iha abertura KNA iha Sentru Formasaun Dom Bosco, Komoro, ohin.

Diretora Nasionál ne’e konsidera ho realizasaun KNA iha área konstrusaun sivíl, otelaria no auto mekániku, mosu tan pasu importante ida bá oin iha espetru polítika formasaun profisionál bazeia ba padraun kualifikasaun nasionál, ne’ebé estabelese ona no sai hanesan sistema úniku hodi implementa formasaun profisionál iha territóriu tomak no hakat daudauk hodi armoniza sistema sira seluk iha rejionál no mundiál.

Realizasaun KNA 2019 ne’ebé hahú iha 6-8 novembru ne’e, hanesan atividade anuál hosi INDMO ba dala-lima hodi fó oportunidade ba joven sira atu demonstra sira-nia abilidade ne’ebé durante ne’e partisipa iha formasaun vokasionál no profisionál.

“Hakarak informa mós katak konkursu aptidaun nasionál iha tinan kotuk (2018) la realiza tanba ita-nia Governu iha mudansa polítika, ne’ebé ohin loron no tinan ida ne’e foin realiza filafali”, dehan Isabel.

Nia afirma, kompetisaun ida ne’e mós sai hanesan baze fundamentál hodi haree realizasaun no implementasaun sistema padraun kualifikasaun nasionál ne’ebé implementa hosi sentru formasaun profisionál no eskola tékniku vokasionál sira, hodi demonstra abilidade pesoál bazeia ba rekursu aprendizajen ne’ebé formula no aprovadu hosi sub-komisaun indústria ne’ebé hamahan-aan iha INDMO.

Rezultadu hosi kompetisaun abilidade nasionál hatudu duni aptidaun ka abilidade hosi estudante sira ne’ebé iha kriatividade, inovadór no produtivu hodi prodús produtu sira ne’ebé tuir demanda konsumidór indústria nian.

Dirijente másima INDMO ne’e subliña, aptidaun ne’ebé mai hosi rezultadu implementasaun sistema formasaun profisionál bele hamosu liña produtu foun iha indústria hodi fó satisfeitu ba konsumidór bazeia ba nesesidade sira-nian.

Liña produtu foun indústria nian bele atrai no estimula hasa’e kreximentu konsome no hasa’e mós podér kompra hosi konsumidór ba nesesidade loroloron nian.

Parte seluk mós rezultadu KNA bele atrai investimentu nasionál liuhosi emprezáriu nasionál no internasionál tanba bainhira traballadór timoroan hatudu abilidade adekuada, bele fó espetativa ba investidór sira atu investe iha Timor-Leste.

“Programa konkursu aptidaun nasionál bele kontribui ba kreximentu ekonómiku liuhosi atualiza aptidaun ou estimula investimentu nasionál hodi bele absorve empregu ba joven sira”, katak.

Partisipa iha abertura ne’e hosi Sekretáriu Estadu Formasaun Profisionál no Empregu (SEFOPE), Embaixadór Austrália iha TL, Peter Robert, autoridade suku Komoro, estudante no grupu konkorrente sira.

Notísia relevante : INDMO Realiza KNA iha Área Konstrusaun Sivíl, Otelaria no Auto Mekániku

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here