Sekretáriu Estadu Formasaun Profisionál no Empregu (SEFOPE), Julião da Silva, hamutuk ho partisipante sira dere babadok hodi loke Konkursu Nasionál Aptidaun, iha Salaun Dom Bosco, Komoro, Dili, Kuarta (6/11/2019). Imajen TATOLI/Antónia Gusmão.

DILI, 06 novembru 2019 (TATOLI) – Institutu Nasionál Dezenvolvimentu Mão de Obra (INDMO) realiza Kompetisaun Nasionál Aptidaun (KNA) iha área konstrusaun sivíl (hanesan kanalizasaun, eletrisidade, pedreiru, karpintaria, soldadura), otelaria no auto mekániku.

Konkursu ne’e ho objetivu lima maka hanesan, promove programa formasaun vokasionál no formasaun profisionál, hasa’e konfiansa indústria ka empreza nian ba iha programa formasaun vokasionál, promove Timor-Leste skills ba regional management no world skills organization, ne’ebé sai sasukat ba armonizasaun TLNQF ho ARQF-ASEAN regional qualification framework no Pac-TVIET, prepara mós kandidatu kualifikadu sira ba partisipa iha konkursu internasionál sira mak hanesan world skills competition, ASEAN skills competition no the belt and road of international skills competition iha Xina.

“Konkursu nasionál ba aptidaun hanesan planu anuál INDMO nian, hala’o bazeia ba padraun kualifikasaun nasionál ne’ebé mak estabelese ona iha Timor-Leste”, Prezidente Komisaun Organizadora Amândio Belo iha abertura Konkursu Nasionál Aptidaun ba dalimak iha Sentru Formasaun Dom Bosco Komoro, ohin.

Amândio Belo afirma, kompetisaun ida ne’e hala’o atu koko padraun nasionál ba formasaun nian no mós promove kualidade sentru formasaun ne’ebé maka fornese ona hosi sentru akreditadu sira.

“Kompetisaun ne’e rasik sei partisipa hosi kompetidór hamutuk 112 hosi sentru formasaun 14 no eskola tékniku vokasionál tolu”, dehan Amândio.

Nia akresenta, INDMO nia espetasaun katak depois KNA ne’e, hakarak lori manán-na’in sira hosi kompetisaun refere bele bá partisipa iha eventu internasionál sira iha futuru, no oras ne’e daudaun, INDMO rasik iha ona aproximasaun ba organizasaun internasionál ne’ebé mak organiza kompetisaun internasionál sira.

Iha kompetisaun tinan ida ne’e, INDMO sira entrega prémiu ba manán-na’in sira ba modalidade hitu. Aléinde prémiu, implementa polítika kona-ba igualdade jéneru nian hodi enkoraja joven feto no mane sira hodi partisipa área hirak ne’ebé iha kompetisaun ne’e.

“Prémiu sira ne’e mak maka hanesan, prémiu espesiál ba feto iha konstrusaun, prémiu espesiál ba feto iha auto mekániku, prémiu espesiál ba mane iha otelaria no prémiu espesiál ba safety”, Amândio informa.

Iha 2019 ne’e, INDMO konsege halo koordenasaun no kooperasaun di’ak ho kompañia nasionál no internasionál sira hodi suporta ba implementasaun kompetisaun nasionál ida ne’e. Kompañia hirak ne’ebé maka sai hanesan juri hodi halo avaliasaun ba kompetidór sira ba área konstrusaun nian mak CHL, ESSET, Philet Lda, Solo Workshop no Panalasa.

Juri iha área otelaria maka hosi Timor Plaza, Otél Timór, Hilton Timor, Dilicious Timor, Casa Vida no Varaidame, no juri ba área auto mekánika maka hanesan Toyota no Auto Vision. Kompetisaun ne’e hala’o durante loron tolu, hahú ohin no sei termina iha sesta (08/11).

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here