Fundadór prinsipál ICS, Antonio Moreira. Imajen: Felicidade Ximenes

DILI, 05 novembru 2019 (TATOLI)-Kontribuisaun ICS (Institutu Siénsia Saúde) ba dezenvolvimentu Timor-Leste iha iha área edukasaun no saúde mak peskiza maske ICS sei hasoru difikuldade finanseira no rekursu umanu liuliu profesór sira hodi hanorin estudante sira.

Fundadór prinsipál ICS, António Moreira haktuir, ICS hala’o ona peskiza iha tinan 2017 ba jestaun enfermária iha Ospitál Nasionál Guido Valadares (HNGV), Ospitál Referál Baucau Ospitál, Referál Maubesi no mós Ospitál Referál Maliana. Depois halo peskiza hotu entrega ninia rezultadu hotu hodi aprezenta iha nivel nasionál.

“Ha’u hanoin peskiza ne’e importante ba universidade sira para koloka ninia pesoál sira hodi peskiza ba nia kualidade no kuantidade ba nia programa ne’ebé relevánsia ho saúde nian. Tanba ne’e institutu Siénsia Saúde deside katak tinan-tinan nia pesoál ida tenke halo peskiza ba programa ida ne’ebé liga ba saúde nian iha nasaun ida ne’e,” dehan Fundadór Prinsipál ISC António Moreira ba Ajénsia Tatoli iha nia kna’ar fatin, ICS-Comoro, ohin.

Nia hatutan, iha tinan ida ne’e ICS sei halo programa estensaun ida. “Ami halo tan peskiza ida ba siénsia ne’ebé ICS adapta entaun ami presiza tenke konsolida ami-nia rekursu umanu ne’e depois ami konvida péritu sira ne’ebé mai husi li´ur hanesan Indonézia atu bele sai oradór hodi aprezenta matéria sientífika ne’e ba ami bainhira ami simu fali estudante foun atu nune’e bele habelar informasaun hotu-hotu ba ema hodi nune’e koko aprende problema saida mak iha ita-nia nasaun”.

“Fó nafatin apoiu no asisténsia ba ita-nia komunidade no mós iha akordu ho Ministeriu Saúde ho Diretór Saúde Munisípiu sira atu fó asisténsia ba estudante sira no hato’o liuhusi sira-nia kna’ar estajiu nian tanba tinan-tinan estudante sira halo peskiza entaun ida ne’e bolu peskiza direita ba komunidade ne’ebé iha aldeia, suku no munisípiu entaun ICS nia kontribuisaun mak tinan-tinan peskiza ne’e”.

Fundadór Prinsipál ICS, António Moreira esplika, ICS la´ós loroloron halo de´it programa aprendizajen maibé tenke iha programa ne’ebé aas liu mak tenke ba peskiza hodi nune’e bele hatene saida mak profesór sira fó durante ne’e.

Fó rezultadu mak koko atu haree kualidade peskiza ne’e tanba programa barak mak ita sei presiza hanesan ospitál hotu-hotu tantu nasionál no mós munisípiu ne’ebé komunidade preokupa hela kona-ba pesoál saúde, enfermaria nian tanba iha ne’e mós liga ba iha programa departamentu enfermaria entaun iha HNGV no mós iha munisípiu ne’ebé komunidade preokupa mak ho atendimentu ne’ebé dalaruma mai husi pesoal saúde sira liuliu enfermaria nian.

“Tanba ne’e mak ami hatutan informasaun ne’e hodi hakbesik ba komunidade hodi hatene informasaun sira ne’e para tinan-tinan halo peskiza hodi hatene saida mak povu sira preokupa ba fasilidade saúde nian. Entaun, ita hanesan universidade privada, parseiru ho governu tenke halo servisu hamutuk hodi sai parseria hodi buka hatene informasaun ne’ebé komunidade enfrenta,” haklaken fundadór prinsipál ne´e.

ICS iha departamentu lima hanesan Farmasia, Enfermajen Parteira, Nutrisaun no Analista Laboratóriu no kada departamentu ida profesór permanente iha na´in hitu no sura departamentu lima ne’e profesór permanente hamutuk 35.

“Ami mós halo kontratu ba doutór espesialista sira hamutuk na´in haat hodi bele hanorin mós estudante ICS,” dehan Fundadór Prinsipál ICS, António Moreira.

Notísia relevante:ICS Apoiu Osan no Rekursu Umanu ba Klínika Bairru Pité

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here