iklan

EKONOMIA, HEADLINE

Alfándega Aprezenta ona Planu Konstrusaun Edifísiu Tunubibi ba MF

Alfándega Aprezenta ona Planu Konstrusaun Edifísiu Tunubibi ba MF

Komunidade sira hala’o atividade iha Fronteira Nunura-Maliana. Imajen/Espesiál.

DILI, 04 novembru 2019 (TATOLI) – Diretór Jerál Autoridade Aduaneira (AA/Alfándega) ein ezersísiu, Julião J. Fernandes, hatete Governu liuhosi Ministériu Finansa (MF) presiza duni fó prioridade ba konstrusaun edifísiu no sosa ekipamentu hodi fasilita servisu Alfándega iha fronteira Nunura-Tunubibi, Postu Administrativu Maliana, Munisípiu Bobonaru.

“Ita presiza nafatin liuliu kona-ba infraestrutura  no mós ekipamentu tau iha ne’ebá (postu Tunubibi), ne’ebé ami  halo ona planu no aprezenta ona ba Ministériu  Finansa atu orsamenta iha proposta OJE 2020”,  Diretór Jerál interinu  ne’e ba Tatoli iha Parlamentu Nasionál, ohin.

Julião Fernandes friza AA aprezenta ona  planu no dezeñu, maibé MF sei avalia hodi deside prioridade atu aloka orsamentu.

“Postu Tunubibi sertamente ita-nia ofisiál sira loroloron halo servisu iha ne’ebá liuhusi parte servisu integradu hodi kontrola negosiante no atividade esportasaun no importasaun”, katak.

Hatán ba planu OJE 2020, ne’ebé Alfándega propoin orsamentu hira, nia dehan ida ne’e tanba haree ba polítika Ministériu Finansa nian no orsamentu ne’e sentraliza.

“Ita agradese bainhira Ministériu Finansa fó prioridade atu tinan oin (2020) liuhusi orsamentu ita bele realiza konstrusaun ne’e hodi monta fasilidade eletrónika no sistema atu fó atendimentu ida kualidade no lais liu”, diretór ne’e espera.

Aléinde ne’e, nia rekoñese katak iha fronteira Tunubibi-Nunura movimentu populasaun halo atividade negósiu no vizita família loroloron tama-sai ho númeru ne’ebé boot no movimentu atividade tama-sai ilegál mós barak tebes akontese iha ne’ebá tanba fronteira ne’e besik kedas ho Atambua mai Nunura-Tunubibi.

Diretór Jerál AA, José António Fátima Abílio, iha entrevista foin lalais ne’e rekoñese katak tinan barak ona membru Alfándega sira iha Tunubibi laiha edifísiu atu halo serbisu kontrolu iha fronteira.

Nune’e liuhusi OJE 2020 sei harii postu emerjénsia Alfándega nian iha fronteira ne’e.

Antes ne’e, ekipa konjunta Komisaun Anti Korrupsaun (KAK) ba Asuntu Prevensaun no Sensibilizasaun, Espesialista Anti-Korrupsaun (EAK), Komisaun Funsaun Publika (KFP) ho Provedór Direitu Umanu no Justisa (PDHJ) Rejionál Bobonaru, observa postu serbisu Fronteira Motain no Nunura-Tunubibi, frajil tebes ba ema livre bele halo tranzasaun ai-moruk droga tama sai Timor-Leste no Indonézia.

Iha vizita serbisu ne’ebé ekipa konjunta hala’o durante loron rua (5-6/7/2019) liubá, nota Alfándega menus rekursu inklui laiha fasilidade adekuada atu fasilita sira halo kontrolu ba sasán sira ne’ebé ema lori tama-sai iha fronteira.

Vizita surpreza ne’e mós nu’udar implementasaun lei númeru 8/2009, 15 de jullu, kona-ba kriasaun KAK artigu 5 Komisaun nia kompeténsia, halibur (rekolla) no analiza informasaun hirak ne’ebé kait ho kauza sira no prevensaun korrupsaun. Halo asaun sira kona-ba sensibilizasaun hodi limitasaun lala’ok korrupsaun nian, motiva ema sira atu kuidadu (preokupasaun) ka hamenus (redús) hahalok no situasaun hirak ne’ebé lori (fasilita) ema ba hamosu hahalok kriminozu sira.

Notísia relevante : Alfándega Sei Harii Postu Emerjénsia iha Tunubibi

Jornalista :  Florencio Miranda Ximenes

Editora : Maria Auxiliadora

iklan
iklan

Leave a Reply

iklan
error: Content is protected !!