Sim Card. Foto/Google.

DILI, 04 novembru 2019 (TATOLI) – Kliente hosi operadór telekomunikasaun hanesan Timor Telecom, Telemor no Telkomcel iha Timor-Leste (TL) ne’ebé uza  sim card ka kartaun ba númeru kontaktu telemovel ativu hamutuk 1,442,497.

“Iha 30 setembru 2019, operadór tolu hanesan Timor Telecom, Telemor no Telkomecel nia totál kliente ne’ebé ativu, bazeia ba dadus atualizadu ne’ebé ANC iha hamutuk 1,442,497”, relata Prezidente Autoridade Nasionál Komunikasaun (ANC) João Olívio Freitas ba Ajénsia Tatoli iha nia kna’ar fatin Kaikoli, ohin.

Nia informa serbisu rejistrasaun no re rejistrasaun kartaun sim ba serbisu telemovel remata ona iha 31 marsu 2019 ho totál kliente rejistradu 1,187,219, totál kliente barradu (blokeadu) hamutuk 143,617.

Hodi haktuir rejistrasaun ba kliente sira hahú hosi 01 abril 2019, nune’e konsumidór sira ne’ebé la kumpre rekizitu rejistrasaun maka hosi ANC hasai hotu ka kliente sira ne’ebé rejistu la ho kartaun identifikasaun.

Bazeia ba regulamentu rejistrasaun no re rejistrasaun sim card ba serbisu telemovél ne’ebe ANC hato’o ona ba operadór sira telekomunikasaun hotu katak operadór ida-idak iha devér no resposablidade atu kria plataforma ida hodi trata rejistrasaun sim card no konsumidór ka kliente hirak ne’ebé maka utiliza kartaun sim refere.

“Bainhira operadór ida fa’an nia kartaun sim, liuhosi ajénsia ka indivíduu sira hodi fa’an iha dalan ninin, operadór refere tenke asegura katak plataforma ida iha ona fatin atu asegura maka tenke fa’an iha operadór nian fatin, maibé kuandu la kumpre maka sei la halo ativasaun”, katak.

Notísia relevante : Operadór Telekomunikasaun Blokeia Ona Sim Card Rihun 50

Jornalista : Natalino Costa 
Editora : Maria Auxiliadora

HAKEREK NO HATÁN

Please enter your comment!
Please enter your name here