Sim Card. Foto/Google.

DILI, 03 agostu 2019 (TATOLI)-Prezidente Autoridade Nasionál Komunikasaun (ANC, sigla portugés), João Olívio Freitas, informa relatóriu ne’ebé operadór telekomunikasaun sira submete ba ANC hatudu katak sim card (kartaun ba númeru kontaktu) telemovel hamutuk rihun 50 mak blokeia ka dezativa ona.

João Olívio Freitas hatete dezde ANC planeia hodi regula operadór sir hanesan Timor Telecom (TT), Telkomcel no Telemor sira hodi hahú halo rejistrasaun husi 30 marsu 2018 no konklui iha 31 marsu 2019, operadór telekomunikasaun rejista kartaun ativa hamutuk millaun 1.2 no dezativa rihun 50.

Nia salienta blokeamentu ba kartaun sira ne’ebé operadór telekomunikasaun sira halo ne’e ba sim card ne’ebé la rejista husi 2018 ba kotuk.

Prezidente ANC ne’e husu ba operadór telekomunikasaun sira iha Timor-Leste atu ema ida hetan kartaun ba telemovel tenke nia rasik mak bá rejista no ema seluk mak rejista fali ne’e labele.

“Sira ne’ebé la rejista ne’e operadór tenke dezativa númeru sira”, nia afirma ba jornalista sira hafoin partisipa sermináriu ho tema “On National Cyber Security 2019″ ne’ebé hala’o iha salaun Ministériu Transporte no Komunikasaun Kaikoli, ohin.

Tanba kestaun sira ne’e maka ANC hasai ona regulamentu hodi fó ba operadór sira katak ema ida kuandu atu hetan sim card tenke ba rejistu lori kartaun eleitorál, enkuantu labarik menus husi idade 17 ne’ebé mak atu hetan kartaun ne’e ho eleitorál inan-aman nian.

Tanba ne’e, kartaun ba númeru kontaktu tenke fa’an iha operadór nia loja no tenke rejistu, bainhira la rejistu ANC husu sira hodi blokeia.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here