informa Diretór Jerál Alfándega, Minstériu Finansa, José António Fátima Abílio.

DILI, 15 jullu 2019 (TATOLI)-  Autoridade Aduaneira (AA/Alfándega) prevee ona osan iha proposta orsamentu jerál estadu 2020 atu harii postu emerjénsia Alfándega nian iha fronteira Nunura-Tunubibi, Postu Administrativu Maliana, Munisípiu Bobonaro.

Diretór Jerál Autoridade Aduaneira, José António Fátima Abílio, rekoñese tinan barak ona membru Alfándega sira iha Tunubibi la iha edifísiu atu halo serbisu kontrolu iha fronteira.

“Agora dezeñu iha ona. Ita espera iha orsamentu 2020 ita bele hatama ona prosesu harii postu ne’e,”  hateten Diretór José António Fátima Abílio, ohin,  ba jornalista iha Igreja Motaél Dili.

Nia dehan, Ministériu Finansas fó ona medida hodi hein orsamentu, temporariamante governu bele harii postu provizóriu ida para halo atendimentu serbisu Alfándega nian.

Diretór Abílio rekoñese iha Fronteira Tunubibi-Nunura movimentu populasaun halo atividade negósiu no vizita família loro-loron tama sai ho númeru ne’ebé boot.

“Ita haree movimentu populasaun tama sai barak loos, no movimentu atividade tama sai ilegál mós barak tebes akontese iha ne’ebá tanba fronteira ne’e besik kedas ho Hakesak-Atambua mai Nunura-Tunubibi,” nia hatete.

Abílio dehan, governu presiza tau orsamentu sosa mós ekipamentu serbisu ba membru Alfándega sira para bele halo serbisu administrasaun la’o ho di’ak.

Kona-ba kondisoens postu fronteira Motain- Batugadé nian, Diretór Abílio dehan, Ministériu Finansas no Alfándega halo ona enkontru atu prevee osan sosa mákina raiu-x hodi rai iha fronteira.

“Agora tama ona iha planu para atu bele sosa tan mákina raiu-x balun tau iha fronteira ne’ebá,” tenik nia.

Antes ne’e, ekipa konjunta Komisaun Anti Korrupsaun (KAK) ba Asuntu Prevensaun no Sensibilizasaun, Espesialista Anti-Korrupsaun (EAK), Komisaun Funsaun Publika (KFP) ho  Provedór Direitus Umanu no Justisa (PDHJ) Rejionál Bobonaro, observa  Postu Serbisu Fronteira Motain no Nunura-Tunubibi, frajil tebes ba ema livre bele halo tranzasaun ai moruk droga tama sai Timor  Leste no Indonézia.

Iha vizita serbisu ne’ebé ekipa konjunta hala’o iha loron rua (5-6/7/2019) liubá, nota Alfándega menus rekursu inklui la iha  fasilidade adekuadu atu fasilita sira halo kontrolu ba sasán sira ne’ebé ema lori tama sai iha fronteira.

Vizita surpreza ne’e mós nu’udar implementasaun lei númeru. 8/2009 15 de Jullu kona-ba kriasaun KAK artigu 5 Komisaun nia kompeténsia, halibur (rekolla) no analiza informasaun hirak ne’ebé kait ho kauza sira no prevensaun korrupsaun. Halo asaun sira kona-ba sensibilizasaun hodi limitasaun lala’ok korrupsaun nian, motiva ema sira atu kuidadu (preokupasaun) ka hamenus (redús) hahalok no situasaun hirak ne’ebé lori (fasilita) ema ba hamosu hahalok kriminozu sira.

Notísia Relevante :  Alfándega Batugadé ho Nunura Frajil 

Presiza Reforsa Rekursu Umanu Iha Alfándega

Jornalista          : Eugénio Pereira

Editór                : Francisco Simões

 

 

 

HAKEREK NO HATÁN

Please enter your comment!
Please enter your name here