DILI, 30 outubru 2019 (TATOLI)-Kongresu nasionál Rede Feto Timor-Leste ba da-lima, foin lalais ne’e, hamosu plataforma prioridade hitu ba 2020-2023.
Notísia Relevante : Rede Feto Elabora Asaun Polítika ba Tinan Haat
Plataforma programa prioridade hitu mak hanesan ko’alia kona-ba kultura no patriarkál tradisionál, edukasaun, saúde, ekonomia ho traballadór feto, tráfiku umanu, polítika no desentralizasaun ho inkluzaun sosiál.
Prezidente Rede Feto Timor-Leste, Judite Dias Ximenes hatete, plataforma ba planu prioridade ne’e elabora hamutuk mai hosi feto potensiál munisípiu 12 inklui Rejiaun Administrativu Espesiál Oe-Cusse Ambeno (RAEOA).
“Atu atinje dezenvolvimentu sustentavel ho inkluzivu mak kontinua husu ba governu liu-liu hosi ministériu ida-idak atu kontinua tau atensaun ba prioridade hitu ne’e,” Judite Dias Ximenes, informa ba Ajénsia TATOLI iha nia serbisu fatin, Caicoli, Dili, tersa (29/10/2019).
Prezidente Rede Feto Timor-Leste ne’e esplika, rezultadu ba asaun planu prioridade ne’ebé prodús sei hato’o ba ministériu relevante ida-idak atu tau atensaun ba implementasaun planu liga ho asuntu feto.
Alende ne’e, kongresu nasionál Rede Feto Timor-Leste hasai mós rezolusaun tolu hosi feto sira; primeiru, ko’alia kona- ba kria komisaun iha nivel nasionál ne’ebé lidera hosi rede feto no munisípiu 12 inklui RAEOA sei lidera husi asosiasaun feto. Segundu, rezolusaun Timor saudavel atu unifika feto ho prinsípiu funu naruk ne’ebé ultrapasa liu ba, terseiru, mak kria komisaun ida hodi halo avaliasaun no monitorizasaun ba apoiu ne’e rasik ba implementasaun planu sira iha asuntu feto.
Sekretária Estadu Igualdade no Inkluzaun (SEIII) maka sei apoiu ba komisaun ne’e hodi hala’o nia kna’ar di’ak liu tan.
Jornalista : Nelson de Sousa
Editór : Francisco Simões
