DILI, 24 outubru 2019 (TATOLI)-Rede Feto Timor-Leste, kuarta (23/10/2019), halo ona abertura ba kongresu nasionál feto ba da-lima hodi hamosu polítika no plataforma ba dezenvolvimentu feto iha setór hotu durante tinan haat hosi 2019-2023.
Kongresu Rede Feto ne’e hala’o iha Sentru Konvensaun Dili (CCD-sigla Portugés) durante loron haat; hahú loron 23 to’o loron 26 outubru, tinan ne’e, ne’ebé partisipa hosi delegada feto hosi Munisípiu 12 inklui Rejiaun Autónomu Espesiál Oe-cúse Ambeno (RAEOA).
Prezidente Rede Feto Timor-Leste, Judite Dias Ximenes, hatete ,Governu implementa ona Planu Estratéjiku Dezenvolvimentu Nasionál (PEDN) no Objetivu Dezenvolvimentu Sustentável (ODS) maibé partisipasaun feto iha dezenvolvimentu seidauk másima.
Notísia Relevante : Movimentu Feto Potensiál Hakarak Halo Mudansa
“Atu define ema ida-idak hosi munisípiu 12 ho RAEOA hamutuk ho delegada sira iha nivel nasionál hodi hamosu plataforma foun sai hanesan referénsia advokasia ba Sekretária Estadu Igualdade no Inkluzaun (SEII) no Rede Feto hodi influénsia Governu no parseiru dezenvolvimentu atu investe no hakbiit feto iha dezenvolvimentu,” informa Judite Dias Ximenes, ohin, ba Ajénsia TATOLI iha CCD.
Notísia Relevante : Rede Feto Presiza Apoia Finanseira
Tuir Rede Feto nia haree dezenvolvimentu Timor-Leste hahú lao ba oin, maibé kazu violénsia hasoru feto kontinua buras, problema manutrisaun, asesu saúde, edukasaun, justisa no seluk tan, sei kontinua mosu diskriminasaun.
Nia hatutan, feto Timor-oan mós iha papél importante ba dezenvolvimentu, tanba ne’e, kongresu nasionál nu’udar meius ida atu identifika problema hotu ne’ebé feto hasoru iha área remotas to’o urbana hodi fó protesaun di’ak liután ba feto.
“Investe iha feto investe iha família no investe iha nasaun,” afirma Judite Ximenes.
Kongresu ne’e hetan apoiu finansiamentu no tékniku hosi Governu, Parseiru Dezenvolvimentu no sosiedade sivíl.
Notísia Relevante : Rede Feto Sei Hala’o Konferénsia Munisipál Feto TL
Jornalista : Osória Marques
Editór : Francisco Simões