DILI, 1 jullu 2019 (TATOLI) – Ministru Estadu Prezidénsia Konsellu Ministru, Hermenegildo Augusto Cabral Pereira informa,  semanan ne’e nia laran, Tribunál Portugés sei deside kapasidade finanseiru Kompañia AtlanticEagle ShipBuilding, ne’ebé hanesan responsável ba kontrusaun Ró Ahi Haksolok.

“Aspeitu legál kuandu diskute kontratu, kuandu ró ne’e seidauk konklui sira seidauk bele entrega ba Governu Timor-Leste. Semana ida ne’e Tribunál sei deside insolvénsia ou lae kompañia ne’e, kuandu iha insolvénsia kompanhia sei hetan konsekuénsia”, tenik iha sesaun plenária segunda ne’e, bainhira halo debate ho deputadu sira kona-ba Ró Haksolok.

Hodi dehan, tuir lei Portugal kuandu iha insolvénsia kompañia, traballadór iha perioridade atu hetan subvensaun.

Tuir Governante ne’e, semana kotuk nia parte koa’lia ona ho Prezidente Rejiaun Administrativa Espesiál Oe-cusse Ambeno (RAEOA), Marí Alkatiri, kona-ba atualizasaun prosesu legal Estadu Portugal hasoru Atlanticeagle Shipbuilding, ne’ebé hanesan responsável ba ezekusaun kontratu Ho Timor-Leste ba Ró Haksolok.

“Iha kustu saláriu ne’ebé Governu Portugés mak tenke selu, ne’ebé kuandu ko’alia ein jerál Governu Portugés mak sei hetan penalidade,” nia akresenta.

Nia dehan tan, sei iha desizaun husi Tribunál, nia vantajen mak  Governu Timor-Leste no Portugés bele tama akordu ida hodi bele asegura konklusaun ró haksolok.

Primeiru-Ministru (PM), Taur Matan Ruak hateten, dezde ninia mandatu, asuntu ne’ebé nia tau atensaun makas mak kona-ba Ró Haksolok, tanba ne’e bainhira iha diferénsa polítika, kazu Ró Haksolok hanesan kestaun nasionál, nune’e Governu i sempre iha Prezidente RAEOA, Marí Alkatiri nia kotuk hodi bele buka solusaun.

“Iha ita-nia istória kuandu ita iha problema ho nasaun seluk, laiha ida mak soe ida. Tanba ne’e ami preparadu, nia bele di’ak ou aat, ami sei la husik no ami sei luta para kazu Ró haksolok bele iha solusaun”, dehan Xefe Governu.

Vise-Xefe bankada Fretilin, Francisco Miranda Branco agradese ba Governu ne’ebé disponível hatan ba rekerimentu Bankada Fretilin atu debate kona-ba asuntu pertinente no hetan fokus boot husi públiku no deputadu sira.

“Asuntu ne’ebé ami rekere tanba interese estadu no envolve prosesu orsamentu estadu, tamba ne’e Parlamentu Nasionál hakarak husu klarifikasaun hodi ita hotu bele kontribui atu buka solusaun no bele garante defeza ba ita-nia estadu no povu nia interese,” nia dehan.

Deputadu Bankada PD, António da Conceiçâo konsidera PM mai fó lisaun furak iha parlamentu Nasionál (PN), kona-ba saida mak interese nasionál.

“Ami kontente no orgullu ba pozisaun ne’ebé Primeiru-Ministru manifesta katak kestaun Ró Haksolok la’ós de’it kestaun Dr. Marí nia maibé ba Timor-Leste hanesan país soberanu”.

Nia aksenta, se Ró Haksolok seidauk to’o iha Timor-Leste, la’ós razaun tanba ema ruma ninia erru ou ema mesak ida ni desizaun maibé ida ne’e kestaun estadu.

Ró Haksolok ho kustu millaun €13,7, inaugura  iha loron 26 maiu 2017 iha sidade Figueira da Foz no tuir informasaun sei to’o Timor-Leste iha outubru 2017, maibé tanba problema internál husi kompañia AtlanticEagle ShipBuilding ho sun-kontratór, mak to’o agora ró seidauk mai.

Ró ne’e rasik iha kapasidade atu tula ema na’in 377 no viatura karreta 15.

Jornalista: Julia Chatarina

Editór.  : Rafy Belo

 

HAKEREK NO HATÁN

Please enter your comment!
Please enter your name here