Eis Primeiru-Ministru Xanana Gusmão halo lansamentu nasionál kolleita sorghum ka batar Kay Rala ektare 38 iha suku Gisu, postu administrativu Maubara, Munisípiu Likisá. Imajen/Natalino Costa.

LIKISÁ, 29 outubru 2019 (TATOLI) – Eis Primeiru-Ministru, Kay Rala Xanana Gusmão, husu Movimentu Kamponeza Timor-Leste (MOKATIL) atu kontinua avansa ho hanoin kriativu, nune’e bele eduka povu hodi dezenvolve setór agrikultura iha Timor-Leste, atu labele dependénsia ba produtu importadu sira.

Tanba planu estratéjiku dezenvolvimentu 2011-2030 iha setór importante tolu maka hanesan setór agrikultura, mina-rai no turizmu.

“Tanba ne’e ha’u husu ba MOKATIL atu kriativu liután iha produsaun kooperativa integrada hodi bele hasa’e setór agrikultura Timor-Leste nian, maske ita konsidera setór agrkultura ne’e sei subsisténsia”, dehan Xanana Gusmão iha lansamentu nasionál dahuluk ba kolleita sorghum ka batar Kay Rala iha Suku Gisu, Postu Administrativu Maubara, Munisípiu Likisá, ohin.

Xanana fiar katak ho esforsu MOKATIL nian bele halo mudansa ba kooperativa liuliu ba kooperativa integrada, tanba antes ne’e MOKATIL ho Sekretáriu Estadu Kooperativa, Arsénio Pereira, iha mehi duni atu dezenvolve kooperativa, tanba ne’e tenke konsensializa no mobiliza agrikultór sira hodi tulun atubele hasa’e no dezenvolve setór ne’e.

“Ha’u enkoraja de’it ba imi atu kontinua imi-nian serbisu hodi diversifika setór kooperativa liuliu ba produsaun“, nia enkoraja.

Aléinde ne’e, louva serbisu ne’ebé hosi parte MOKATIL halo tanba bele tulun ona Sekretáriu Estadu Kooperativa hodi halo dezenvolvimentu iha setór kooperativa Timor-Leste.

Tuir Xanana esforsu ne’ebé maka MOKATIL halo nu’udar meiu ida atu dezenvolve ekonomia Timor-Leste tanba MOKATIL rasik hahú mobiliza ona populasaun atu halo produsaun ba setór agrikultura rasik.

“Ha’u kontente tanba timoroan komesa kaer ona serbisu hodi prodús rasik hanesan ohin iha lansamentu nasionál ba kolleita shorghum ka batar Kay Rala, ida ne’e nu’udar pasu pozitivu, ha’u fó parabéns ba imi MOKATIL”, dehan Xanana Gusmão.

Iha fatin hanesan, Prezidente MOKATIL, Hélio Dias da Silva, afirma lansamentu ne’e MOKATIL kompromete hodi asina deklarasaun katak kontinua sai parseiru ba SEKoop ba dezenvolvimentu setór kooperativa sira iha Timor-Leste.

“Ami promete ho deklarasaun ne’e sai parseiru Governu nian hodi hamutuk ho povu agrikultór sira hodi fortifika produsaun integrada, aléinde setór kooperativa no setór integradu sira seluk”, dehan nia.

Sekretariu Estadu Kooperativa, Arsenio Pereira, afirma kontinua asegura relasaun di’ak ho MOKATIL atu sai parseiru iha tinan lima ba dezenvolvimentu kooperativa.

Entretantu, MOKATIL iha ona membru rihun 72 iha munisípiu 12 inklui Rejiaun Adminnistrativa Espesiál Oekusi Ambenu (RAEOA).

Notísia relevante : Xanana-Governu Halo Lansamentu Nasionál ba Kolleita Sorghum Ektare 38

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here