Eis Primeiru-Ministru Xanana Gusmão halo lansamentu nasionál kolleita sorghum ka batar Kay Rala ektare 38 iha suku Gisu, postu administrativu Maubara, Munisípiu Likisá. Imajen/Natalino Costa.

LIKISÁ, 29 outubru 2019 (TATOLI) – Líder nasionál, Kay Rala Xanana Gusmão ho parte Governu liuhosi Sekretáriu Estadu Kooperativa (SEKoop), ofisialmente halo lansamentu nasionál dahuluk ba Sorghum ka Batar Kay Rala hamutuk ektare 38 iha suku Gisu, postu administrativu Maubara, Munisípiu Likisá.

“Ohin ami halo lansamentu ba batar Kay Rala iha Suku Gisu hamutuk ektare 38”, dehan SEKoop Arsénio Pereira ba jornalista sira hafoin remata serimónia lansamentu nasionál ba batar Kay Rala, ohin.

Hafoin eventu ne’e, Arsénio Pereira salienta batar Kay Rala bele halo produsaun ba hahán alternativa tanba sei fa’an iha merkadu no sei fornese ba programa merenda eskolár maske seidauk hatene loloos kuantidade, maibé garante ona atu sai mós hahán ba merenda eskolár.

“Ami garante nia merkadu, la’ós ba merkadu de’it maibé SEKoop mós sei halo koordenasaun ho Ministra Edukasaun hodi fornese ba merenda eskolár tanba batar Kay Rala nia nutrisaun di’ak ba saúde”, hateten.

“Ha’u hanoin katak volume atu fornese ba merenda eskolár ne’e to’o tanba kada ektare ida ba batar Kay Rala ne’e rata-rata tonelada 2.5”, tenik.

Iha fatin hanesan, Administradór Munisípiu Likisá, Domingos da Conceição dos Santos, louva serbisu SEKoop nian tanba komesa dudu kooperativa rai-laran

Nia parte mós louva ba esforsu Movimentu Kamponeza Timor-Leste (MOKATIL) tanba hamutuk ho povu bele komesa organiza populasaun hodi partisipa iha ekonomia.

“Ha’u lori komunidade Likisá nian naran hodi fó obrigadu ba Governu tanba hili Likisá sai hanesan munisípiu ba lansamentu nasionál batar Kay Rala. Ha’u apresia MOKATIL sira-nian serbisu tanba ho kolleita batar Kay Rala, bele dehan komesa book-aan hodi esforsu atu hasa’e produsaun hodi kore-aan husi dependénsia produtu rai-li’ur”, afirma.

Eis Primeiru-Ministru Xanana Gusmão mós louva serbisu ne’ebé durante ne’e husi parte MOKATIL halo tanba bele tulun ona SEKoop hodi halo dezenvolvimentu iha setór kooperativa Timor-Leste.

Tuir Xanana, esforsu ne’ebé maka MOKATIL halo daudaun ne’e nu’udar meiu ida atu dezenvolve ekonomia Timor-Leste tanba MOKATIL rasik hahú mobiliza ona populasaun atu halo produsaun ba setór agrikultura rasik.

“Ha’u kontente tanba timoroan komesa kaer ona serbisu hodi prodús rasik hanesan ohin iha lansamentu nasionál ba kolleita sorghum ka batar Kay Rala ne’e nu’udar pasu pozitivu tebes no ha’u fó parabéns ba imi MOKATIL”, dehan eis Prezidente Repúblika ne’e.

Iha lansamentu ne’e, hetan mós prezensa husi Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, Sekretáriu Estadu Ambiente (SEA), Demétrio do Amaral de Carvalho no ajénsia relevante sira inklui autoridade lokál no parte seguransa.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here