Prezidente Autoridade Nasionál Petróleu no Minerál (ANPM), Gualdino da Silva. Imajen/Tatoli.

DILI, 03 outubru 2019 (TATOLI) – Prezidente Autoridade Nasionál Petróleu no Minerál (ANPM), Gualdino da Silva, hateten kompañia 10 ne’ebé asina ona kontratu ho Governu Timor-Leste (TL) hodi halo esplorasaun iha kampu Bayu Undan sei selu taxa direita ba Estadu Timor-Leste hodi hatama ba kofre Estadu ka fundu petrolíferu.

“Agora, ita la fahe ona taxa ho Austrália maibé kompañia operadór sira selu taxa diretamente ba Timor-Leste hodi hatama ba fundu petrolífera”, Prezidente ANPM ba Ajénsia Tatoli iha Sentru Konvensaun Dili, ohin.

Gualdino da Silva afirma empreza 10 ne’e kontinua halo esplorasaun iha área ne’ebé uluk iha Joint Petroleum Development Area (JPDA), maibé hafoin Timor-Leste ho Austrália troka nota diplomata, Fronteira Marítima Permanente Tasi Timór entrada iha vigór, área ne’e tama ona jurizdisaun Timor-Leste nian.

“Agora ita diskute karik kompañia balun nia kontratu hotu iha 2021-2022. Ita kontempla hela oinsá mak sira-nia kontratu hotu husik ona para TIMOR GAP, E.P bele kontinua hala’o esplorasaun”, katak.

Prezidente ANPM ne’e mós dehan, negosiasaun la’o hela ho kompañia ENI husi Itália ho nia parseiru sira mós hala’o atividade peskiza.

“Kampu Kitan mós ita haree hela oinsá mak bele dezenvolve fali no Buffalo iha dentru fulan neen nia laran sei iha perfurasaun ba peskiza ida, se pozitivu komesa prodús ona iha tinan rua tan nia laran”, dehan.

TL asina kontratu ho fahe produsaun hamutuk lima, rua ba kampu Bayu Undan, ida atu substitui JPDA PSC 06.105, ida atu substitui JPDA PSC 11.106 no ida-seluk ba tranzisaun kampu petrolíferu Buffalo ba Timor-Leste nia jurizdisaun ne’ebé autoridade reguladora mak Governu Timor-Leste no ANPM.

Antes ne’e, Governu Timor-Leste asina ona kontratu fahe produsaun foun lima ho empreza sira petróleu no gás nian ne’ebé afeta husi Tratadu Ketan Tasik, atubele garante estabilidade no seguransa ba operasaun offshore iha Tasi Timór, durante períodu tranzisaun nian tomak husi Tratadu Tasi Timór ba Tratadu Ketan Tasik foun.

Governu asina ona mós akordu foun ho Governu australianu kona-ba troka informasaun fiskál sira entre Timor-Leste no Austrália, no memorandu entendimentu rua entre instituisaun sira husi Estadu rua ne’e nian hotu ne’ebé loke dalan ba kooperasaun iha matéria mina-rai nian liuliu kona-ba jestaun kadoras mina Bayu Undan nian no kona-ba transferénsia dadus jeolójiku no kooperasaun ne’ebé mak iha relasaun.

Iha 28 agostu 2019, Governu TL asina akordu foun ho empreza 10 atu halo esplorasaun iha Tasi Timór mak ConocoPhillips, INPEX, Tokyo Timor Sea Resources, Eni, Kompañia Santos, CARNARVON Petroleum Lda, REPSOL, TIMOR GAP, NOPSEMA no Department of Industry Innovation and Science Australia.

Notísia relevante : Governu Asina Kontratu Foun ho Kompañia 10 Ne’ebé Halo Esplorasaun Iha Área JPDA

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here