Ekipa apoiu Jurídiku MRLAP nian halo konsultasaun públiku Lei Kostumeiru ho Justisa Tradisionál iha Postu Administrativu Venilale, Munisípiu Baucau, tersa (29/10/2019). Imajen/Osória Marques

VENILALE, 29 outubru 2019 (TATOLI)- Administradór Postu Administrativu Venilale, Munisípiu Baucau, Carlos Alberto Guterres, hato’o agradesimentu ba Ministériu Reforma Lejizlativu no asuntu Parlamentár (MRLAP) ba konsultasaun públiku ho komunidade sira, lia na’in no étniku  sira kona-ba Lei Kostumeiru ho Justisa Tradisionál.

Notísia Relevante : MRLAP Hala’o Konsultasaun Públika ba Lei Kostumeiru ho Justisa Tradisionál iha Baucau

Administradór Postu Administrativu Venilale, Munisípiu Baucau, Carlos Alberto Guterres. Imajen/Osória Marques

“Ha’u agradese no orgullu ba MRLAP nia programa ne’ebé mak halai liu ba konsulta públika lei kostumeiru no justisa tradisionál,”  hateten Carlos Alberto Guterres, ohin,  iha ámbitu konsultasaun Lei Kostumeiru ho Justisa Tradisionál  hosi ekipa jurídiku MRLAP iha salaun Postu Administrativu Venilale.

Administradór Postu Venilale ne’e fó sasin katak,  durante ne’e komunidade sira sempre rezolve disputa kiik sira iha nivel suku uza lei kostumeiru ka tara bandu. Maibé bainhira Governu hanoin fó kbiit liu tan ba lei kostumeiru sira ne’e di’ak liu tan atu bele fó baze legal  atu rezolve kazu sira iha nivel suku mook to’o iha tribunal.

Konsulta públiku MRLAP nian ne’e, Carlos Alberto Guterres hateten, bele ajuda lia nain sira, xefe suku no xefe aldeia bele iha interasaun di’ak liu ho governu atu oinsá mak bele prodús Lei Kostumeiru ida di’ak ba ajuda fó kbiit ba lia nain sira iha suku latan tesi lia no rezolve disputa sira ne’ebé la presiza to’o Tribunal.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here