Ministru Obra Públika, Salvador Soares dos Reis Pires. Imajen António Gonçalves.

DILI, (TATOLI) – Ministru Obra Públika, Salvadór Eugénio Soares dos Reis Pires, hateten ekipa tékniku ministériu sei prepara lejislasaun atu transforma Eletrisidade Timor-Leste (EDTL) sai Empreza Públika (EP).

“Ministériu ho ekipa tékniku halo hela preparasaun hodi estabesse lei kona-ba reforma EDTL ba empreza públika”, dehan nia ba jornalista sira iha Palásiu Governu, ohin.

Salvador hatutan nia parte halo ona kontaktu ho Komisaun Funsaun Públika (KFP) hodi haree preparasaun ba funsionáriu destakadu sira.

“Ha’u ko’alia ona ho Komisaun Funsaun Públika atu haree preparativu sira, oinsá atu destaka funsionáriu públiku sira ne’ebé mak hakarak nafatin sai funsionáriu públiku ba instituisaun seluk governu nian, kuandu sira obta para atu kontinua”, katak.

Kuandu reforma ne’e akontesse, nia afirma funsionáriu sira iha obsaun rua, hakotu knaar hanesan funsionáriu públiku no sai funsionáriu kontratadu ba empreza ou kontinua hanesan funsionáriu públiku maibé destaka ba instituisaun seluk. Nia mós informa agora dadauk funsionáriu iha EDTL hamutuk 500 resin.

Antes ne’e, Asosiasaun Tane Konsumidór (ATC-sigla portugues) liuhosi konferensia imprensa sujere ba Governu atu aselera estatutu EDTL sa EP, atu masimiza prestasaun servisu.

Razaun sira fó sujestaun ne’e ba Governu tanba ikus-ikus ne’e ahi mate bebeik no afeta ba konsumidór nomós ba Estadu tanba investe boot iha instituisaun ne’e.

Jornalista: Julia Chatarina

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here