DILI, 24 outubru 2019 (TATOLI)–Vise Sekretáriu Adjuntu Interinu Defeza Estadu Unidu Amérika (EUA) ba Ázia Meridionál no Sudeste Aziátiku, Chris R. Johnstone ho Prezidente Repúblika (PR), Francisco Guterres Lú Olo, diskute dalan (meiu) oinsá fortifika kooperasaun iha àrea defeza entre nasaun rua.
“Objetivu prinsipál hosi vizita ne’e, atu diskute ho Prezidente Repúblika kona-ba dalan ka meiu oinsá mak bele uza ba fortifikasaun kooperasaun defeza ho Governu Timor-Leste iha futuru”, Chris hateten lia hirak ne’e hafoin enkontru ho Xefe Estadu iha Palásiu Prezidente Nicolau Lobato, Bairru Pité, ohin.
Chris esklarese katak, loos duni, nia mai hosi Departamentu Defeza Estadu Unidu Amérika nian, Washington, no nia estadia iha ne’e, atu hametin di’ak liután kooperasaun iha área defeza entre Estadu rua.
Kona-ba enkontru ne’e, nia dehan, Prezidente Repúblika partilla mós opiniaun hanesan ho Governu Estadu Unidu Amérika ninian no Chris promete hakarak atu esplora liután dalan ka meiu sira atu fortifika relasaun iha área ida-ne’e.
Bainhira husu kona-ba impresaun ba área defeza Timor-Leste (TL) nian, reprezentante defeza EUA ne’e apresia ho progresu ne’ebé área defeza atinje ona inklui prosesu demokratizasaun.
“Ami apresia ho progresu ne’ebé Timor-Leste halo ona iha tinan rua nulu ikus ne’e ba área defeza nian, liuliu iha prosesu demokratizasaun”, nia apresia.
Entretantu, Chris R. Johnstone ninia vizita ida-ne’e hanesan vizita ba dahuluk iha Timor-Leste.
Jornalista: Cipriano Colo
Editór: Xisto Freitas
