Diretór Nasionál Aprovizionamentu MOP, Quintiliano Afonso Belo. Imajen/Florencio Miranda Ximenes.

DILI, 08 agostu 2019 (TATOLI)-Diretór Nasionál Aprovizionamentu Ministériu Obra Públika (MOP), Quintiliano Afonso Belo, informa kompañia hamutuk 40-resin hahú tuir ona konkursu públiku atu halo estudu viabilidade no Detailed Engineering Design (DED) ba sidade Universitária Aileu iha outubru tinan ne’e.

Nia salienta MOP prevee orsamentu ba estudu viabilidade no DED sidade universitária Aileu hamutuk rihun U$550.

“Ami sei deside ho profisionál atu kompañia ne’ebé manán konkursu (tender) bele hala’o estudu viabilidade no dezeñu ho kualidade ho padraun internasionál hodi ajuda Governu atu hala’o konstrusaun ba sidade universitária Aileu iha tinan 2020”, Diretór Nasionál Aprovizionamentu ba Ajénsia Tatoli iha nia kna’ar fatin Kaikoli, ohin.

Tanba ne’e, MOP aprezenta ona dokumentu termu referénsia (ToR) konkursu públiku no elijibilidade inklui kritéria avaliasaun ba kompañia 40-resin ne’e bainhira aprezenta metodolojia estudu.

“Sira (kompañia) liu ona lima besar, ami sei konvida atu sira aprezenta sira-nia metodolojia ba estudu viabilidade no dezeñu, husi ne’e mak ita hili kompañia ida sai vensedór ba hala’o estudu”, katak.

ToR konkursu públiku ne’e, nia dehan kompañia tenke iha kapasidade atu halo estudu viabilidade ba impaktu jeotékniku, ambientál, sósiu-ekonómiku, liuliu analiza ba fakuldade saida de’it mak atu loke ka muda ba iha Aileu durante fulan tolu ou fulan neen.

Rekerimentu báziku MOP, Diretór Quintiliano dehan kompañia tenke iha konsulta, rejistu iha Timór no hala’o joint Venture (sósiu) ho kompañia internasionál ne’ebé iha estudu ba área estudu sira.

Nia adianta, foin dahuluk iha Oitavu Governu Konstitusionál mak loke konkursu públiku ba kompañia sira atu hala’o estudu viabilidade, molok Governu prevee osan ba konstrusaun.

Notísia relevante : 2020, MESSK Realiza Konstrusaun Sidade Universitária Aileu

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here