Membru Polisia Nasional Timor-Leste ho karreta water canon wainhira halao aprezentasaun iha Kuatél Jerál PNTL, Caicoli, Dili, loron 10 Fevereiru 2017. Imajen/dok.TATOLI

MANATUTO, 25 outubru 2019 (TATOLI)-Eskuadra Polisia Nasionál Timor-Leste(PNTL) tolu iha area jurizdisaun Manatuto nian enfrenta difikuldade boot atu halo operasaun tanba falta transporte.

Polisia eskuadra tolu ne’e, kompostu hosi Eskuadra Natarbora, Laleia no Laclo, Munisípiu Manatuto.  Durante tinan barak ona enfrenta falta karreta operasaun hodi tulun polisia atu halo atuasaun  ba kazu insidente no asidente tráfegu.

Notísia Relevante: Laiha Rádiu ho Karreta Difikulta Operasaun PNTL Bobonaro

Segundu Komandante Polisia Munisípiu Manatuto, Superintendente Asistente Polisia, Joni Viana, kinta (24/10/2019), iha Manatuto, informa ba Ajénsia TATOLI katak, karreta hirak ne’ebé koloka ba eskuadra polisia tolu durante tinan barak nia laran avaria ona no la halo manutensaun.

“Ida ne’e mak difikuldade ba ami nian,” hateten Joni Viana, hodi hatutan, maske nune’e membru Polisia sira kontinua halo esforsu ho nia kbiit rasik hodi asegura seguransa ba komunidade sira no fó atendimentu ba públiku hodi mantein Lei ho Orden.

Komandu Munisípiu Manatuto jere karreta haat iha munisípiu  laran hodi bele atende nesesidade serbisu polisia nian no kontinua jere atu bele halo operasaun to’o eskuadra polisia Natarbora, Laleia ho Laclo.

Komandu PNTL Munisípiu Manatuto iha membru efetivu 118 ne’ebé na’in 35 koloka ba suku nu’udar Ofisiál Polisia Suku (OPS) no  na’in 85 destaka iha komandu no eskuadra sira.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here