Komandante PNTL Munisípiu Bobonaro, Superintendente Xefe, Octávio de Araujo Bucar. Imajen/Antonio Goncalves

BOBONARO, 10 outubru 2019 (TATOLI)-Polisia Nasional Timor-Leste (PNTL) Munisípiu Bobonaro, enfrenta hela difikuldade iha atividade operasaun iha liña fronteira terrestre tanba menus karreta operasaun no la iha rádiu komunikasaun.

Komandante PNTL Bobonaro Superindente Xefe Polisia, Octávio de Araújo Bucar, hateten, Polisia Eskuadra  Kailako, Lolotoe, Balibo no Atabae laiha rádiu komunikasaun hodi fasilita komunikasaun entre komandu munisípiu ho eskuadra sira bainhira atende situasaun ruma.

 ”Ami nia rádiu komunikasaun durante ne’e avaria hotu ona. Ida ne’e preokupasaun boot ida ba ami,” hateten Octávio de Araújo Bucar, ba Ajénsia TATOLI iha Maliana, tersa (08/10/2019).

Polisia Eskuadra Balibo, Kailako no Lolotoe mós laiha karreta operasaun tanba ne’e uza motor privadu hodi halo servisu no hala’o operasaun. Maske nune’e, Komandu PNTL Bobonaro ho nia membru tomak kontinua esforsu hodi fó seguransa ba populasaun tanba ne’e husu governu atu toma konsiderasaun ba problema hirak ne’e.

PNTL Bobonaro  iha membru efetivu hamutuk na’in 150 ne’ebé koloka iha eskuadra hitu inklui Ofisiál Polisiamentu Komunitária (OPS) 25 no restu destaka iha komandu munisípiu.

”Númeru ne’e seidauk sufisiente, tanba área jurizdisaun Bobonaro  nian luan, liuliu atu kobre nesesidade seguransa iha liña fronteira terrestre,” Octávio hateten.

Jornalista : Nelson de Sousa

Editor       : Francisco Simões

HAKEREK NO HATÁN

Please enter your comment!
Please enter your name here