Rede Feto halo enkontru ho parseiru nasionál iha salaun Fundasaun Alola, Dili, Tersa (09/07/2019). Imajen/Osoria A. Marques

DILI, 09 jullu 2019 (TATOLI)—Rede Feto hanesan organizasaun ne’ebé serbisu ba feto nia interese ho vizaun Feto Timor Leste livre husi diskriminasaun oioin, atu nune’e feto Timor Leste bele dezenvolve-an iha iklima igualdade, no bele partisipa ho kontribui ba dezenvolvimentu global.

Rede Feto ne’ebé harii iha loron 10 marsu 2000, oras ne’e presiza tebes apoia finanseira atu bele atinje meta serbisu ne’ebé konsagra iha planu no polítika.

Rede Feto ne’ebé mai ho misaun Luta no Defende feto nia interese; Hasae feto nia kapasidade atu involve-an iha iklima igualdade no bele kontribui ba prosesu dezenvolvimentu; no promosaun ba direitu feto, ohin, iha salaun Fundasaun ALOLA, realiza enkontru ho parseiru nasionál sira atu bele komunika malu oinsá buka dalan bele hetan fundu ba reforsa serbisu Rede Feto nian.

Programa estratéjiku Rede Feto mak hala’o advokasia, dezenvolve kapasidade membru, sentru Informasaun no komunikasaun no hakbi’it feto iha partidu polítika.

Prezidente Rede Feto, Judite Dias Ximenes, hateten, enkontru ne’e  evaluasaun hamutuk ho parseiru nasionál sira ne’e bele haree hamutuk dezafiu Rede Feto nian, liuliu iha área kapasidade rekursu umanus no rekursu finanseiru.

“Programa serbisu, ami atinje kuaze 40% de’it tanba la iha possibilidade. Ami atu haka’as-an atu to’o iha 90%  susar tanba menus rekursu umanu no rekursu finanseira,” informa Prezidente Rede Feto, Judite Dias Ximenes, ba Ajénsia TATOLI hafoin enkontru ho parseiru nasionál.

Nia informa katak,  Nova Zelándia no Estadu Unidus Amérika sira kontinua loke odamatan ba parseiru nasionál sira atu bele hatama sira-nia proposta.

“Ohin ne’e ami konvida ami-nia parseiru sira husi nasionál nune’e mós parseiru sira ne’ebé mak foun atu oinsá mak bele loke sira-nia fuan, néon para aumenta osan uitoan ba programa serbisu Rede Feto nian,” hateten Judite Dias Ximenes.

Partisipasaun ba seminário ne’e mai husi Ajénsia sira Nasoins Unidas (ONU) hanesan UNICEF, Embaixada Estadu Unidus Amérika mai Timor-Leste, membru Rede Feto, sosiedade sivíl no mós organizasaun ka asosiasaun nasionál sira.

Membru Rede Feto nian durante ne’e mak hanesan Fundasaun AlolaFokupers, APSC-TL, GFFTL, Klinika PAZ, FKSH, Caucus-Feto Polítika, Santa Bakhita, FMF-Liquiça, OMT, OPMT, AMST, UNFETIP, ISMAIK, Sagrada Familia, Asosiasaun JURISTAS, ET-WAVE, Hari’i Au-Metan, PRADET, HAFOTI, FFEO-Oecusse, FPSH, Fund. Moris Hamutuk (FMH) no Fundasaun Harii Familia (FHF).

Jornalista          : Osoria A. Marques

Editór                 : Francisco Simões

HAKEREK NO HATÁN

Please enter your comment!
Please enter your name here