Diretór Jerál Administrasaun no Finansa Ministériu Transporte no Komunikasaun (MTK), Deonísio de Araújo. Foto/Natalino Costa.

DILI, 24 outubru 2019 (TATOLI) – Diretór Jerál Administrasaun Finansa hosi Ministériu Transporte Komunikasaun (MTK), Deonísio de Araújo, salienta antes ne’e, identifika ona atu konstrui terminál iha Tibar, maibé sei halo koordenasaun ho liña ministeriál.

“Horiseik ministru fó ona orientasaun mai ami na’in-tolu, Diretór Jerál Ministériu Transporte no Komunikasaun, Diretór Jerál Administrasaun no Finansa no Diretór Jerál Tékniku Ministériu Transporte no Komunikasaun, atu hahú koordena hodi haree fatin foun ba konstrusaun terminál foun, maske antes ne’e identifika ona katak iha Tibar, hafoin identifika maka foin deside iha nivel polítika”, haktuir nia ba Ajénsia Tatoli iha nia knaar fatin Kaikoli, ohin.

Hodi hatutan maske MTK identifika ona fatin iha Tibar, parte lixu nian atu konstrui terminál, maibé Ministériu Administrasaun Estatál (MAE) kestiona tanba presiza iha koordenasaun ho liña ministeriál atubele solusiona asuntu ida ne’e.

Tanba ne’e iha tempu badak, MTK sei halo koordenasaun ho MAE, Munisípiu Dili, Sekretária Estadu Terras no Propriedade, Ministériu Obra Públika no Ajénsia Dezenvolvimentu Nasionál.

“Iha tempu badak, ami sei halo koordenasaun ho Ministériu Estatál, Munisípiu Dili, Terras no Propriedade hodi rezolve kestaun rai, antes ami ba ko’alia ho autoridade suku Tibar”, dehan nia.

Maibé nia adianta katak área lixu fatin ne’ebé lokaliza iha Tibar maka la konsege, MTK pozisiona konstrui terminál iha área Tibar ne’ebá.

Nune’e, bainhira identifika ona fatin maka MTK sei halo estimasaun ba kustu orsamentu ba konstrusaun terminál nian.

Terminál ne’ebé sei konstroe foun tanba antes ne’e, MTK liuhusi empreza Mar Vermelha harii ona iha Tasitolu, maibé Primeiru-Ministru husu hodi kansela obra ne’e tanba fatin refere konsidera nu’udar zona protejida no sítiu istóriku no tuir planu Governu iha hanoin atu halo prezervasaun.

Nune’e, dirijente MTK sira simu orientasaun husi ministru atu haree fatin hodi konstrui terminál ba pasajeiru.

Osan ba konstrusaun terminál Tasitolu ne’e mai husi Konsellu Administrasaun Fundu Infraestrutura ho montante inisiál $346. 340,27 no pagamentu obra ne’e hela de’it dólar rihun 200. Obra ne’e hahú iha 2014 no atinje ona 80%.

Notísia relevante : Terminál Tasitolu Sei Muda bá Tibar

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here