Terminál Tasitolu. Foto/Natalino Costa.

DILI, 01 Outubru 2019 (TATOLI) – Diretór Jerál Administrasaun Finansa Ministériu Transporte no Komunikasaun (MTK), Deonísio de Araújo, informa terminál Tasitolu sei muda bá Tibar, hanesan fatin ne’ebé Governu identifika ona.

“Ami identifika ona fatin ba terminál foun ne’ebé sei konstrui iha Tibar, parte fatin lixu”, Deonísio de Araújo ba Ajénsia Tatoli iha nia serbisu fatin Kaikoli, ohin.

Nia hatutan, MTK identifika ona fatin atu konstrui terminál foun, maibé sei koordena ho parte Munisípiu Dili tanba konstrusaun terminál sei halo iha parte fatin lixu nian, maibé antes ne’e mós MTK koordena ona ho Autoridade Suku Tibar.

Deonísio de Araújo husu kompresaun públiku atu hein kona-ba prosesu konstrusaun terminál foun tanba presiza tempu atu solusiona, no ida ne’e la’ós fásil.

Tanba MTK sei halo estudu viabilidade profunda antes implementa obra, nune’e sei envolve Sekretáriu Estadu Terras no Propriedade, Munisípiu Dili, Ministériu Obra Públika no Ajénsia Dezenvolvimentu Nasionál.

“Estudu ne’e sei halo hodi haree fatin ne’e viavel ka lae, nune’e bá oin labele iha problema tan. Ami sei halo ida ne’e hodi tetu parte hotu antes halo dezeñu no BOQ, kuandu sira loos hotu ona, maka ami foin loke konkursu hafoin fó ba kompañia atu halo”, konklui.

Notísia relevante : Terminál Tasitolu Kanseladu Tanba Konstrui iha Sítiu Istóriku

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here